Online Reporter
Zimpapers Sports Hub
“YISO isikipa sethu lesi?”
Lo ngumbuzo okubalandeli beqembu leHighlanders asebevuke ngolaka betshengiswa i-kit entsha yeqembu, okubikwa izagqokwa kulisizini.
Sekwedlule amasizini ambalwa iqembu leHighlanders lisehluleka ukutholela abalandeli bayo i-kit yokugqoka nxa besekela iqembu.
Lalo iqembu ngokugcweleyo kalilayo i-kit, nanko abadlali abatsha bagqoka izikipa zabadlali abasukayo, osekucunule inengi labalandeli, elibika ukuthi inkokheli zeqembu zihlalele umsebenzi.
Kube buhlungu, kwavusa ulaka lapho kuvela i-kit entsha yeqembu kodwa isimanga kube ngamaphutha abonakale kusikipa lesi esigcwele ku-social media.
Isikipa lesi silophawu lweqembu olungayisilo njalo kulotshwe ukuthi iqembu lasungulwa ngo-1928, kumele kube ngu-1926.
Isikhulumi seBosso uNozibelo Maphosa uthe kazi lutho, wakhetha ukuthi intatheli ikhulume lomaqhuzu uKindman Ndlovu.
“Sikubona ku-social media. Kasikakhiphi isikipa esitsha. Siphezulu kwakho lalabo esisebenzisana labo beseSouth Africa,” kutsho uNdlovu.
Ngokutsho kwabafakazi abaqotho, kubikwa umsebenzi wokuthunga i-kit entsha le wawukhokhelwa ngowayephethe isikhundla sikamaqhuzu uBrian Moyo.
Kubikwa kwabhadalwa imali ephakathi kwe US$20 000 le-US$27 000.
