Online Reporter
Ethel Ncube
KUBOTSHWE izigebengu eziyisificaminwe mibili ebesezihluphile emalokitshini ehlukeneyo koBulawayo ngokuhlasela abantu ngamabhemba lamahloka zibatshontshele omakhalekhukhwini kunye lenye impahla eqakathekileyo.
Kubikwa izigebengu lezi bezikhokhelwa ngenye indoda ethengisa omakhalekhukhwini abatshontshiweyo.
Isikhulumi samapholisa koBulawayo uAssistant Inspector Nomalanga Msebele uthe iqula lezigebengu leli belikhokhelwa nguKurauwone Nkomo oleminyaka engu-46 owaziwa kakhulu ngokuthi saMishy obelesitolo endaweni yeFusini, elokitshini leMakokoba, onguye obethenga omakhalekhukhwini abatshontshiweyo.
Abanye balezi zigebengu bathi uTafadzwa Chimusaru (30), Prince Ngulube (18), Leeroy Sibanda (19), Hardlife Sibanda (27) bonke behlala eMzilikazi kuthi uBrian Ndlovu (23) weMakokoba, loNqobile Terrence Ngwenya (20) ngoweQueens Mine.
Izigebengu lezi zincedise ukuthi kuqedisiswe amadokethi avulwayo angu-20 amacala okuhlasela abantu behlomile enzakala koBulawayo emalokitshini athi Queenspark, Sauerstown, Khumalo, Makokoba, eNtumbane, kunye leHillside.
Izigebengu lezi bezihlasela abantu ngamabhemba kunye lamahloka endaweni eziliganga futhi ezimnyama.
Kubikwa amacala la baqala ukuwenza kusukela ngenyanga kaMpalakazi ka2024 kuze kufike kunyanga kaNkwenkwezi lonyaka.
“Izigebengu lezi bezihlasela zilimaze abantu ngamabhemba egangeni leNtumbane, Khumalo, Hillside kanye lasegangeni elehlukanisa isibhedlela seMpilo le-United College of Education (UCE).
“Sibonga uzulu ukusincedisa ngombiko osincedise ukuthi siyebopha izigebengu lezi. Sixwayisa uzulu ukuba angahambi endaweni ezimnyama, eziliganga ngoba ziyingozi.
“Sixwayisa labo abalinyazwa yizigebengu lezi abangabikenga emapholiseni ukuthi baye enkambeni zamapholisa eziseduzane labo bayebika amacala lawo ukuze babone ukuthi abetheswacala ayisibi yini ababahlaselayo,” kutsho uInsp Msebele.
