Online Reporter
UMDLALI weqembu le-Orlando Pirates, uThalente Mbatha usebike ukuba kuzamele baqaphele ukuthi bengahlohlwa kuqala emdlalweni wabo leqembu lePyramids koweConfederation of African Football Champions League.
IBucs izabhekana lePyramids ye-Egypt kuhlandla lesibili le-semi-final yeCaf Champions League ngoLwesihlanu ngehola lesitshiya galombili, eJune 30 Air Defence Stadium, eCairo.
Amaqembu la abambana nge 0-0 kuhlandla lakuqala, kumdlalo owawusenkundleni yeFNB, ngoMgqibelo. UMbatha uthe kumele benqabele ukuthi bengahlohlwa kuqala emdlalweni.
“Kumdlalo wangoMgqibelo sibe lomnyama, bekungayisilo usuku lwethu. Sakhe inqwaba yamathuba kodwa sangavaleli ngitsho elilodwa enethini.
“Kodwa-ke okufanele sikwenqabele njengoba sisiya kuhlandla lesibili, yikuthi singabavumeli bahlohle kuqala ngoba siyazi ukuthi sizabhekana lani.
“Nxa sibavumela ukuthi bathole ibhola kuqala enkundleni yabo, siyabe sizifake enkingeni. Kodwa-ke ukuzethemba kithi kuphezulu ngoba ekuhambeni besilokhe sisenza kuhle. Sike saya eCairo, sabuya lempumela emihle. Okumqoka njengakhathesi yikulolonga ingqondo yethu kakuhle, siye kulumdlalo sisesimeni esihle ngoba kusengenzeka loba yini,” kutsho umdlalo lo.
IBucs ilwela ukuthola inkanyezi yesibili ngokuqukula inkezo yalumqhudelwano eyawunqoba ngo-1995 isehlula i-Asec Mimosa ye-Ivory Coast nge-3-2 sekuhlanganiswe impumela yamahlandla amabili omdlalo.
Amaqembu la abambana nge-2-2 kuhlandla lakuqala lomdlalo owawuse South Africa, kwathi kowesibili iBucs yanqoba nge-1-0, kuhlohle uJerry “Legs of Thunder” Skhosana, ngebhola alitshaya maqede kwaquleka abanye abalandeli beMimosa.
