Online Reporter
Bhekimpilo Tshalibe
UGATSHA olubona ngezoMhlabathi, Amanzi kunye loKuthuthukiswa Kwemaphandleni soluxwayise abalimi ukuthi baqalise amalungiselelo okulima ingqoliyi ngoba yenza kuhle ngesikhathi somqando.
UMqondisi weAgricultural and Rural Development Advisory Services (Ardas) esabelweni seMatabeleland North uMnumzana Mkhunjulelwa Ndlovu ukhuthaze abalimi ukuthi baqalise amalungiselelo okulima ingqoloyi.
UMnu Ndlovu uveze lokhu kuWinter Crop Revolution Conference koBulawayo ebihlelwe yinkampani yeZimpapers ibambisane logatsha lwezoMhlabathi, Ezomhlabathi, Amanzi kunye loKuthuthukiswa Kwemaphandleni.
UMnu Ndlovu uthe izabelo zeMatabeleland North kunye leSouth ziyathembisa ukuthola isivuno esiphezulu nxa bengalima ngendlela eqondileyo.
“Sikhangelele ukuthi isabelo seMatabeleland North lonyaka singavuna amahekitha angu-5 000, njalo esabelweni seMatabeleland North sikhangelele ukuthi singavuna amahekitha angu-2 500, ilizwe lonke sikhangelele ukuvuna amahekitha angu-120 000,” kutsho uMnu Ndlovu.
Ubuye waveza ukuthi abalimi sebezaqalisa ukuphiwa umvundiso ovela kuHulumende.
“UHulumende useqalisile ukuyemukela umvundiso njalo ngithanda ukuthembisa abalimi ukuthi kungekudala bazathola umvundiso ovela kuHulumunde,” kutsho uMnu Ndlovu.
Uphethe ngokuthi abanye abalimi sebeqalisile ukulima ingqoloyi.
“Abanye abalimi sebeqalisile ukulima ingqoloyi njalo sikhuthaza abalimi ukuthi bengasebenzisi inhlanyelo ezingaqondanga ngoba yizo ezenza bangatholi isivuno esikhangelelweyo,” kuphetha uMnu Ndlovu.
