admin
INtatheli kaMthunywa
KULENDODA ehlala eNyatsime, eChitungwiza elonkosikazi ofe ngomnyaka odluleyo, inhlabathi yengcwaba yathathwa yadliwa ngabanye omama bakuleyo ndawo besithi baphathisa omunye wabo ozithweleyo, othi umuyi usevuka isipoko esibuya endlini yakhe yokulala siwisele imiganu phansi sikhala.
UMnunzana James Vengai oleminyaka engu-40, ekhaya evela eBikita, eMasvingo, wahlangana lendaba yabomama ababili labo abadla inhlabathi yengcwaba lomkakhe ngesikhathi isidumbu sibekwa.
Omama laba abadla inhlabathi yengcwaba bathi bakwenza lokhu ngoba omunye wabo owayezithwele wabona isidumbu sikamufi, ngoba kuzila esintwini ukuthi umuntu ozithweleyo abone isidumbu kungakho bazama ukumsiza ngokudla inhlabathi leyo.
UNkosikazi wendoda le, uChipo Jiri kubikwa wafa engena isonto engenwa ngomama laba abadla inhlabathi yengcwaba.
Esinye isimanga ngesokuthi umufi wangcwatshwa egqokiswe isembatho sikankosikazi womfundisi wesonto abeyingena.
“Indaba engihluphayo ngeyokuthi emzini wami akusahlaleki, unkosikazi wami uvuka isipoko. Uyabuya endlini ngikhangele kwesinye isikhathi ngibona umbane, abuye engangena abesewisela imiganu phansi.
“Izolo ubuye waqala ukukhala engikhangele kungekho akukhuluma lami,” kuchaza uMnunzana Vengai.
Indoda le ithi idinga abangenelisa ukuyisiza ukuze umuyi aphumule ngokuthula angaphenduki njalo.
“Ngaphandle kokumbona engena endlini, ngiyezwa izisinde zomuntu ohambayo phandle. Emzini wewele likankosikazi wami kwenzakala okufanayo, kuzwakala umsindo phezu kwendlu kuzwakale lesikhova ebusuku,” kuchaza uMnu Vengai. Uthi wabikela ubabazala wakhe ngendaba leyi.
Online Reporter