admin
YiNtatheli kaMthunywa
ILIZWE leZimbabwe liqaphele ngelihlo lokhozi njengoba ikhefu lePhasika selisondele, kugxilwe ikakhulu kumgcele yokungena lokuphuma elizweni kukanti njalo kwenziwa imkhankaso yokufundisa umphakathi njengoba uHulumende ezama ukwenqabela ukubuye kube lokutheleleka kweCovid-19 ngesikhathi lesi sesiphithiphithi.
Kukhangelelwe ukuthi kube lokwanda kwabantu abahambayo kuleli kunye lakwamanye amazwe njengoba kuvame ukuthi kube lembuthano ngesikhathi sekhefu leli lezokholo.
Okwakhathesi elizweni leZimbabwe sokulabantu abatheleleke umkhuhlane lo abangu-36 717, kuthi abangu-34 447 basila kwadlula emhlabeni abangu-1 516. Izinga lokusila kumkhuhlane lo liku-93,8 phesenti kukanti khathesi kulabantu abangu-754 abalokhu bephethwe yiCovid-19. NgoLwesibili kube labantu abangu-33 abatholakale belomkhuhlane lo kwafa ababili.
Ekhuluma ngemva komhlangano weKhabhinethi ngoLwesibili, uMphathintambo obona ngezembiko kunye lokukhitshwa kwayo uMonica Mutsvangwa uthe iziphathamandla zikuqaphele ukuthi kungenzakala inani labantu abahanqwa ngumkhuhlane lo likhuphuke ngesikhathi sekhefu lePhasika.
“Njengoba ikhefu lePhasika selisondele, iKhabhinethi iphawula ukuthi kulamathuba amanengi okuhamba kwabantu kuleli kunye lakumigcele, okunikeza indawo evundileyo yokutheleleka komkhuhlane lo. Ngalokho, ugatsha olubona ngezeMpilakahle lokondliwa kuhle kwabantwana luzaqinisa ukukhangelwa, ukuphathwa kanye lokukhulumisana ngengozi lomphakathi njengoba silinde ikhefu lePhasika. Kuzagxilwa kakhulu kumgcele yokungena lokuphuma,” kutsho uMphathintambo uMutsvangwa.
Online Reporter