admin
YiNtatheli kaMthunywa
BEKUTHUNQA uthuli lothudlana kunkezo yeGodlwayo Super League kumpelaviki edluleyo lapho okunqobe khona iqembu leBhode kulumqhudelwano oqhutshelwe enkundleni yeVokola eNsiza.
Bekudibene amaqembu ayisitshiya galolunye kubangwa inkezo esekelwe liqula labosomabhizimusi abaziwa ngokuthi yiQuad M, okuyibo njalo abaxhasa iligi.
IQuad M le iloBhekimpilo kaMaranda Sithole, Kossam Mavuna Ndlovu, Zibusiso Majankwe Ncube loCastro Magenga Ndlovu.
Osomabhizimusi laba minyaka yonke benza umkhosi wokuhlanganisa amaqembu eGodlwayo Super League kunkezo ezitshiyeneyo ngendlela yokuthuthukisa ezemidlalo kulindawo.
Amathimu adlale lonyaka abalisa iMbembesi, Silalatshani, Mbondweni, Sigwambizi, Bambanani, Mabuze, Denje, Bhode leVokola.
Kunkezo edluleyo, iBhode FC ihudule zonke, yatshaya iqembu leSilalatshani nge 1-0 kumdlalo wokucina. Ithimu le ithethe umvuzo wenkezo leR2 000.
Abafana beSilalatshani baphenduke ekhaya begodle iR1 500.
Isikhulumi seQuad M, uBhekimpilo kaMaranda Sithole ubikele iphephandaba likazulu ngemva kwemidlalo ukuba bayasuthiseka ngobunono benguqu abayibukele kumaqembu akoGodlwayo.
“Ukutshelwa yikuncitshwa. Ithalenta eligcwele kuGodlwayo Super League lidinga ukubatshazwa. “Abafana badlala inguqu emnandi njalo ilobungcitshi esingeke sabubona lakwamanye amaligi aphakemeyo,” kutsho uSithole.
“Ukugcwala kwababukeli enkundleni yeVokola kuyisitshengiselo sokuthi iligi iyakhula lomdlalo usuthola usekelo. Umcimbi wethu wenkezo yeGodlwayo Super League uqhube kakuhle sibili. Le ibiyinkezo yesine edlalelwe ngamaqembu ayisitshiya galolunye njalo isekelwe ngamadoda alothando lezemidlalo iQuad M.”
USithole uthembise ukuthi iQuad M izaqhubeka isekela inguqu koGodlwayo. Uthe ngoMpalakazi indlela ziqonda enkundleni yeSigwambizi.
“Asipheli moya ngokusekela abantu bakithi ngokuphakamisa ezemidlalo. Sihlose ukuthi sincedise abasakhulayo bathole ukusebenzisa ithalenta labo baziphilise, baphakamise imuli zabo lesizwe.
Online Reporter