admin
Bongani Ndlovu
ABALIMI ikakhulu abafuye inkomo sebekhuthazwe ukuthi bazivikele kumkhuhlane we-anthrax ngoba uyingozi njalo ulakho ukuthanyela isibaya.
Umkhuhlane we-anthrax uyingozi kakhulu ngoba uhlasela izifuyo kanye labantu. Abantu bangadla inyama yenkomo elomkhuhlane lo balakho ukucina behlaselwa ngumkhuhlane lo.
Ekhuluma loMthunywa uMnu Cosmas Muzunde onguLivestock Production Officer esabelweni seMatabeleland North uveze ukuthi inkomo zandise ukuhlaselwa ngumkhuhlane lo kubangelwa yizibungwana.
“I-anthrax ngumkhuhlane obangelwa yi-bacteria ebizwa ngokuthi Bacillus anthracis. Isifuyo ebesihlaselwe ngumkhuhlane lo singahlinzwa isikhumba, amaphaphu lezangaphakathi kuyabe konakele.
“Isikhumba singonakala kumila izilonda ezitshotshozelayo esikhumbeni sesifuyo. Ngokuya kwesikhathi izilonda lezi ziba mnyama ngaphakathi okuyisibonakaliso ukuthi isifuyo sihlaselwe ngumkhuhlane lo,” nguMnu Muzunde lowo.
“Umlimi ulakho ukubona ukuhlasela komkhuhlane lo ezifuyweni kusukela ngelanga lakuqala laphakathi kwenyanga ezimbili isifuyo sihlaselwe,” kuchaza uMnu Muzunde.
Kubikwa indlela yokwenqabela umkhuhlane lo yikuthi umlimi avimbe izifuyo ekuhlanganeni lezifuyo esezihlaselwe ngoba kulula ukuthi zithelelane.
“Abalimi bengavikela izifuyo zabo ezingakatholi umkhuhlane lo ngokwehlukanisa esezihlaselwe lezingahlaselwanga ngoba umkhuhlane lo utholakala ngokuthelelwana. Enye indlela yokuvikela izifuyo lezi yikuhlanza izibaya zenkomo zikhathi zonke,” kuchaza uMnu Muzunde.
Uqhubekele phambili waveza ukuthi kuqakathekile ukuthi abalimi babelolwazi ngomkhuhlane lo ngoba uyingozi ezifuyweni lasebantwini.
“Njengenhlanganiso sikhuthaza abalimi bonke ukuthi babelolwazi olujulileyo ngomkhuhlane lo. Abalimi bakhuthazwa ukuthi bengadli izifuyo ezifa zodwa ikakhulu lezo ezingahlolwanga ngoba kwesinye isikhathi isifuyo siyabe sibulewe ngumkhuhlane lo okungabangela njalo ukuthi labantu bagule,” kutsho uMnu Muzunde.
Online Reporter