admin
Thokozile Mbedzi
ZILOKHU zinkemile izakhamizi zeMatopo ngemva kokuba elinye isela libhaxabulwe lanathiswa idibha ngabangane balo akade libatshontshele okubangele ukuthi livuke lifile.
Umuyi uTalent Dube ubhubhe ngeviki ephelileyo kulandela ukutshaywa ngabangane bakhe abathathu abathi uElivis Maphosa oleminyaka engu-19, Trymore Ncube oleminyaka engu-23, loMandlenkosi Marray oleminyaka engu-19 ngoba ebatshontshele impahla ezazichayiwe kanye lomakhalekhukwini.
Umuyi uDube ubesebenza labetheswacala.
Kubikwa uDube esetshontshile wabaleka wayaficwa elokhu elomakhalekhukwini okuyikho okwabangela ukuthi bamtshaye bacine bemnathisa ledibha.
Ekhuluma lenthatheli kaMthunywa omunye umfakazi oqotho uMnumzana Londani Gumede uveze ukuthi lokhu bethithibele ngamajaha la angabangane kodwa alwa aze anathisana idibha.
“Ngilokhu ngilesithuli njalo ngimadolonzima ngamajaha la ngoba sonke besibona bengabagane njalo bezijabulela zikhathi zonke singazi ukuthi moya bani owangena kuTalent wasetshontshela abanye bakhe impahla lomakhalekhukwini. Abangane bakhe bamlandela bathe bemthola elomakhalekhukhwini bacunuka bamtshaya.
“Bathe sebemtshayile baphinda bambamba ngamandla bathi kanathe idibha.”
Online Reporter