Online Reporter
Ethel Ncube
ZIKHAKHAMELE izakhamizi zeMasvingo ngemva kokuba enye indoda ihuge indoda ebithandana lomkayo ngemilayezo, yayihlahlela ngebhemba, yafa.
Indoda le, uTheophilus Mutikani (25) wakuVillage 3 eMagogo, ngaphansi kwenduna uMurinye, wetheswa icala lokubulala uEdmore Rugara (36), okucatshangelwa ukuba ubethandana lomkakhe.
UMutikani umiswe emthethwandaba omkhulu weMasvingo ngeviki ephelileyo phambi kukaMahluli uSunsley Zisengwe wanikwa ibheyili ye-S$50.
Umthethwandaba uthe uMutikani wazinikela emapholiseni kazange abaleke kukanti uRugara, wabeka impilo yakhe engozini ngokuya endlini yomfazi owendileyo ebusuku ngo-9 pm.
Kubikwa isehlakalo lesi senzakala mhlaka 20 Mbimbitho kuVillage 3 Magogo.
Unkosikazi kaMutikani, uPretty Chidzimwe (20), wayethengisa umfushwa kuWhatsApp mhlaka 19 Mbimbitho, uRugara wasemphendula ku-inbox.
UMutikani kubikwa wathatha umakhalekhukhwini womkakhe wasebona umlayezo lo wacabanga ukuthi kukhona okutshaya amanzi phakathi kwalaba ababili.
UMutikani waqhubeka wabhalela uRugara imlayezo engathi ngumkakhe.
Wamkhohlisa ukuthi afike emzini wakhe, uRugara wafika ngo-9 ebusuku, okwenza uMutikani wamhlasela ngengqamu kunye lebhemba, wamlimaza esandleni, emlenzeni kanye lehlombe.
URugara wenelisa ukubaleka waya kwenye indlu okungaba ngamakhilomitha amahlanu, kodwa wedlula emhlabeni ekuseni ngelanga elilandelayo engakatholi usizo lokwelatshwa.
Amapholisa abikelwa ngesehlakalo futhi athola ingqamu emzini kaMutikani.
UMutikani wazihambisa eNemamwa enkambeni yamapholisa.
Peter Tanyanyiwa