admin
Thokozile Mbedzi
ZILOKHU zinkemile izakhamizi zesigabeni seDombodema ePlumtree ngemva kokuba enye indoda inathe idibha yafa ngoMvulo kuyonale iviki kulandela ukuxabana lomkayo kubangwa inkukhu.
UBhekithemba Ngabi oleminyaka engu-33 yokuzalwa kubikwa unathe idibha wafa ngemva kokuxabana lonkosikazi wakhe kubangwa inkukhu ayezithengisile.
Kuzwakale ukuba uNgabi wathi ebuzwa ngunkosikazi wakhe ukuthi uthengiseleni inkukhu wazonda wagana unwabu wasethatha idibha wayinatha.
Kubikwa unkosikazi wakhe wathi ebona ukuba usenathe idibha wazama ukumgijimisela esibhedlela kodwa ngokusweleka kwenhlanhla wadlula emhlabeni.
Ekhuluma lentatheli kaMthunywa uMnumzana Bonani Moyo uveze ukuthi lokhe bedidekile ngesehlakalo lesi ukuthi umuntu angaze azibulale kubangwa inkukhu.
“Lokhu kusidanisile kakhulu ngoba lokhe singakuzwisisi kuhle ukuthi kungani kucine kusiba lokufa kubangwa inkukhu nje.
“Ababili laba uhlupho lusukele ekuthini uNkszn Ngabi wabuza umkakhe ukuba kungani ethengise inkukhu yena wazondela ukuthi kungani ebuziwe wahle wankunkuluza idibha. Esenathe idibha leli uNkszn Ngabi wazama ngamandla wonke ukuba amgijimisele esibhedlela kodwa kwehlula wabhubha,” kulandisa uMnu Moyo.
Isikhulumi samapholisa esabelweni seMatabeleland South ulnspector Loveness Mangena ebuzwa ngodaba lolu uthe solufikile ehofisini yabo ngakho uxwayisa uzulu ukuba nxa eyehlelwe luhlupho kabikele abanye abafana labaphathi bezigaba ukuze bethole ukwelulekwa impilo ingalahleki mahlayana nje,” kuphetha uInsp Mangena.
Online Reporter