admin
YiNtatheli kaMthunywa
ISIFISO seqembu lenguqu iHighlanders yikuthi amaqembu eCaps United leFC Platinum anqotshwe kumidlalo emibili eseleyo ukuze lenelise ukuthwala inkezo yeligi yeCastle, kutsho imvimbi uEric Mudzingwa.
Imidlalo yeCastle Lager iyaqhubeka kulimpelaviki kulandela ukumiswa okwamaviki amabili. IBosso idibana leFC Platinum ngeSonto, ibisigqiba isizini ngokwamukela iHwange ngeviki elilandelayo.
UMudzingwa, okunguye oyetheswe ibhanti likakaputeni weBosso kumidlalo eminengi kulisizini, ubike ukuthi yena labanye abadlali abakalahli ithemba lokuphakamisa inkezo enkulu eyacina ukuba sezandleni zeBosso ngo2006.
Ukuthwala inkezo sekube yisifiso salumdlali okwesikhathi eside.
UMudzingwa kakaze ayithwale inkezo yePSL lokhe wafika kuHighlanders njalo nguye umdlali osedonse isikhathi eside ekuleliqembu.
Ubike ukuthi inhloso yabo kumidlalo eseleyo yikubhaxabula izimbamgodi zeFC Platinum egumeni layo. IBosso ayikaze inqotshwe enkundleni yeMandava.
“Silokhe sikhona kumjaho wokuhluthuna inkezo yeligi. Kambe singalahla ithawulo kusegcekeni ukuthi iHighlanders isalele ngemiklomelo emilutshwane kuphela.
“Abalandeli bethu abaze ngobunengi eMandava ngoba ukusekela kwabo yikho okusinikeza idlabuzane,” nguMudzingwa lo.
Ngokuma kwengalane yeCastle Lager okwamanje, iCaps United ingena umdlalo wesi-29 ilemklomelo engu-57, ilandelwa yiFC Platinum eku-55. IHighlanders kunombolo yesithathu ile-53.
Ukaputeni wethimu yezwe lonke ukhulume amazwi ahambelana lakamqeqetshi uErol Akbay osephume kumaphephandaba kanengi, ebika ukuba leqembu lakhe lisesekhona kumbango wokuba yintshantshu yeligi ephakemeyo.
“Wonke amaqembu akuligi yePSL adlalela ukuthi abezintshantshu. IHighlanders layo ikhangelele okunjalo,” nguAkbay lo ebikela intatheli kumaviki amabili adluleyo.
Kusenjalo, iCaps United, okukhangelelwe ukuthi yetheswe umqhele wokuba yingqwele yenguqu, izadlala leNgezi Platinum. Lo ngomunye umdlalo ozadonsa amehlo lendlebe zabalandeli bomdlalo ngoba ukunqoba kweCaps United kutsho ukuthi iqembu leli lingahle libizwe njengentshatshu zakulisizini.
ITsholotsho ingena umango iqonde eWhite City ngoMgqibelo ilande ukuyadinga ukunqoba phezulu kweBulawayo City. Iziqholo zeZhwane zihlezi evalweni lokuphuma kuligi yePSL nxa zingehluleka ukunqoba imidlalo emibili eseleyo.
Intshantshu zesizini ka2015 iChicken Inn zisekhaya labafana abavalelisa inguqu iBorder Strikers ngeSonto eLuveve.
Imidlalo yeCastle Lager ngokupheleleyo:
NgoMgqibelo
Tsholotsho v Bulawayo City (White City).
Mutare City v Harare City (Sakubva).
ZPC Kariba v How Mine (Nyamhunga).
NgeSonto
Hwange v Chapungu (Colliery).
Chicken Inn v Border Strikers (Luveve).
Triangle v Dynamos (Gibbo).
FC Platinum v Highlanders (Mandava).
Caps United v Ngezi Platinum (National Sports Stadium).
Online Reporter