Online Reporter
YiNtatheli kaMthunywa
ABALIMI besigabeni seMatobo eMatabeleland South bazahlangana eSt Joseph’s Mission ngoNcwabakazi emkhosini weGood Seed and Food Festival, ozagxila ekulondolozeni inhlanyelo yezilimo zomdabu, ukudla kwesiNtu lokuqinisa ezokulima ezivikela imvelo.
Umkhosi lo, ohlelwe yinhlanganiso ye-Abavuseleli Bemvelo Community Initiative, uzaqhutshwa mhlaka 6 Ncwabakazi kuWard 8 lo 9 ngaphansi kwenduna uBidi Ndiweni.
Abazabukisa bazafika mhlaka 5 Ncwabakazi, kuthi ngosuku olulandelayo kube yilo olomkhosi, ukwahlulela lokwethulwa kwemiklomelo.
Abaqoqi balumbuthano bathe umkhosi lo uzahlanganisa abalimi, abakhokheli bomdabu, ingatsha zikaHulumende lenhlanganiso ezisebenza kwezokulima ukuze babelane ulwazi.
Umqondisi wohlelo uMnumzana Dingaan Ndlovu, uthe umkhosi lo uzabe uyindlela yokuncoma umsebenzi owenziwa ngumphakathi.
“Umkhosi lo ngowokunanza ukuqina komphakathi wethu kwezokulima, ukugcina amasiko ethu okulima lokuzimisela kwethu ukuqhubeka sivuselela umhlabathi lokuvikela imvelo,” kutsho uMnu Ndlovu.
UMnu Ndlovu ukhuthaze abantu ukuthi baphatheke kulumkhosi.
“Ukuba khona kwenu kuzasinika isithunzi njalo kukhuthaze umphakathi wethu njengoba sisebenzisana ukulondoloza inhlanyelo yomdabu lokwakha ikusasa elilokudla okwaneleyo.”
