admin
UBEHLALA lamadoda amabili okweminyaka eminengi kodwa akazange alwe lamadoda ngoba enikana amathuba okuchitha isikhathi lesithandwa sawo.
Kodwa ngeviki ephelileyo ukuthula phakathi kwalaba abathathu kuphenduke kwaba yisisanasana nanko phela amadoda wonke omabili abefuna ukuchitha ubusuku lesimomondiya sawo kungoLwesibili.
Kubikwa kulwiwe kwaba luthuli sokuvela ukuthi ubukhwele bukhona phakathi kwalaba ababili okokuthi uAmos Mahlangu odabuka eChris Hani, indawo eseduzane le-Etwatwa Ekurhuleni ugwazwe wafa ngulo akade etshintshana laye umfazi.
Bathe benanzelela ukuthi uMahlangu usedlule emhlabeni abantu babophise umsolwa kodwa basebenakana ukuthi inina leli lifundiswe isifundo elingasoze lafa lasikhohlwa kodwa-ke inina lelo beselithethe imitshaqana yalo ladliwa ngumswenya.
Esinye isakhamuzi sithe: “Okwenziwa linina leli kubi kakhulu. Njengomuntu ongumama kulihlazo ukuthi ubelamadoda amabili. Asisafuni kumbona lumama lapha endaweni yethu. Akumelanga abuye ngoba sizamenza okubi nanko phela ubangele ukufa kukaMahlangu, ngabe kazange aziphilise njengendoda elesithembo ngabe kafanga lo osengumuyi.”
Yiloba ezinye izakhamizi bezisisithi kazikuthakazeleli obekusenziwa linina leli amanye amanina abesithi kuhle amadoda lawo ake azwe ukuthi isithembo sinjani loba silakho ukubangela ukufa.
“Mina bengimbona njengeqhawe phakathi kwamanina. Kunzima ukuthi umfazi abelendoda eyodwa kodwa yena ubelamabili. Ngimtshayela ihlombe ubeyazi into yakhe,” kutsho elinye inina.
Elinye njalo inina lithe: Amadoda ahlala elabafazi abanengi, nxa sokusenziwa linina sokubangela umsindo emphakathini. Angiyiboni into embi ngokuba lamadoda amabili. Yiyo okuthiwa yinkululeko leyo.”
Kusenjalo abomdeni kamuyi bathi bafuna ukubona umthetho usebenza ngamandla kundaba yomunye wabo.
Udadewabo kamufi uElizabeth Khumalo, uthe: “Indoda le ebulele umnewabo kumele ihlawule kanzima njalo ipike ejele okweminyaka eminengi.”
“Umama lowana ubelesithembo!”
Kuvulwe idokhethi emapholiseni Etwatwa Police Station.
Umsolwa uvele emthethwandaba njalo ukhangelelwe ukuthi abuyele njalo maduzane nje. — Ubulembu
Online Reporter