adminNcekwenhle Ncube
INHLANGANISO yeNational AIDS Council (NAC) emhlubulweni weMguza isiqale umkhankaso wokufundisa abantu bakule indawo ngegcikwane lengculazi ikakhulu izimbamgodi kusukela.
Ekhuluma lentatheli uNkosikazi Soko Ncube ongumqondisi wenhlanganiso uthe bafisa ukuthi abantu bakule indawo babelolwazi mayelana leHIV leAids. Uthe bakhangelele ukuthi wonke umuntu azi isimo sakhe kusiyaphela umnyaka.
“Inhlanganiso yethu ihlose ukwabela abantu bonke ulwazi mayelana leHIV le Aids. Lokhu kuzabaphathisa ukuhlela ikusasa labo lezimuli zabo. Siyakuqakathekisa ukuthi sikhuthaze abantu ukuthi bazi isimo sabo mayelana legcikwane lengculazi ngoba abantu abanengi bacina benanzelela ukuthi bayagula ngemva kwesikhathi eside lamasotsha omzimba esekhulelwa.
“Thina siyabavakatshela emisebenzini yabo. Siyacela kunkokheli zabo ukuthi zisiphe isikhathi lezisebenzi ngoba wonke umuntu ulelungelo lokuzuza impilakahle.
“Kule indawo abantu abanengi abachitha ithuba elinengi besemisebenzini yabo okwenza kube nzima ukuthi bavakatshele ezibhedlela. Kungakho sibalanda thina ngoba ulwazi mayelana lalumkhuhlane silalo kungakho siyabanika lolo lwazi okugoqela ulwazi ngamaphilisi okuthithibalisa igcikwane lengculazi kanye lokuzithwala nxa umuntu ephila lengculazi,” kutsho uNkkz Ncube.
Iphephandaba libikelwe ukuthi kulemidlalo eqoqwa yinhlanganiso le. Ngombuthano lo abatsha ikakhulu bayafundiswa izifundo ezigoqela ukusetshenziswa kwamakhondomu, lalokho okumele bakwenze nxa bengatholakala belegcikwane.
UNkosikazi Ncube ubuye wabika ukuthi basebenzisa ontanga ukuthi bafundise abanye babo. Lokhu kwenza bakhululeke njalo babuze imbuzo ephathelene lempilakahle yabo.
Uqhubekele phambili esithi bakhuthaza abantu ukuthi bavakatshele ezibhedlela bayesoka ngoba layo kungenye yezindlela ezaphathisayo.
Ebuzwa ngokuzwisisa kwabantu mayelana ngezifundo zabo uthe abantu bakhanya sebekuzwisisa khathesi nxa kuqathaniswa lasekuqaleni. Uthe abantu ekuqaleni babe lenhloni zokubuza imbuzo lokuvakatshela ezibhedlela.
Indawo esezizuze imfundiso le igoqela iSkhoveni Mine lezitampa zakoJB.
Online Reporter