admin
UKWANDA kwethalenta elitsha kwezemidlalo sekufuqe indoda ebatshazwa ngokuthi yiyo eqine kulamanye onke kuleli u-Mr Zimbabwe Men’s Physique, uRyan Gumbo, ukuthi akhethe ukuncintisa kunkundla eziphezulu.
Uthe kungcono ukuthi avulele abasakhulayo indlela yokuthi bazibonakalise ngoba yena usehlose ukulungisela umncintiswano omkhulu owe-Arnold Classic ozaqhutshelwa kweleSouth Africa ngomnyaka ozayo.
UGumbo uqale ngokwekela ukuba yingxenye yabancintisana kunkezo enkulu yeHarare Classic kulinyanga esithi ithuba lelo ngelabasadinga udumo lenkundla zokwakha amabizo.
Umncintiswano we-Arnold Classic kwakumele uqhutshwe ngoNkwenkwezi lonyaka kodwa wedluliselwa phambili ngenxa yesifo seCovid-19.
Ekhuluma lephephandaba likazulu uGumbo ubike ukuba ukhathazekile ngokuswelakala kwemincintiswano elakho ukuphakamisa abasakhulayo.
“Lonyaka kulabasakhulayo abanengi abaphatheke kumincintiswano efana leHarare Classic. Ngikubone kungcono ukuthi ngitshiyane lokuphatheka kunkundla ezinye ngikhangelele kunkundla eziphezulu ezibalisa owe-Arnold Classic,” kutsho uGumbo.
UGumbo usethole inhlonipho ngokuqhubeka kwakhe esekela abasakhulayo kulumdlalo wokubonakalisa ukuqina komzimba.
“Ukusekela lokuphakamisa umphakathi kukimi. Njalonje ngiyatshiseka ngokukhalaza kwentsha yakithi efuna ukuphakanyiswa. Ngilapha nje kungenxa yosekelo engaluthola kwabanye abantu, yikho kumele ngiqhubeke ngosizo kwabanye.”
Online Reporter