admin
YiNtatheli kaMthunywa
AKUBIZWA ozawayo ngoLwesihlanu lapho okuzavuthiswa inkundla zesikolo seDewure High eGutu kudibene osaziwayo benguqu mhla kusungulwa umncintiswano wezikolo oweCOPA Coca-Cola.
Amaqembu enguqu yamantombazana kubikwa lonyaka lawo azadlala kanyekanye labafana. Lokhu ngokwakuqala lokhe izikolo zaqala ukuncintisana ngo1989.
Inkampani yamanamunede iCoca Cola yiyo ehlawulela imidlalo le.
Imidlalo yokukhankasela ukuyafika ku-final yalinkezo iqala mhlaka 10 kuNhlangula ezinqintini zonke zelizwe.
Intshantshu zezabelo zidibana eGwanda kusukela mhlaka 22 kusiya ku-24 Ntulikazi.
Isikolo seDewure High yiso esabayintshantshu nyakenye kuhlandla labafana ngokunqoba iRujeko 4-3 kumidlalo eyaqhutshelwa koBulawayo.
Izikolo ezedlula 200 zikhangelelwe ukuthi zincintisane kuze kuyefikwa ku-final eGwanda.
Umncintiswano lo ususekele inguqu yamantombazana njalo. Umphathisikolo weGwanda High uArthur Maphosa ubike ukuthi imncintiswano enjengale kumele ibe yinkuthazo kuzikolo ukuthi ziqalise ukulolonga amantombazana kunguqu.
“Abantwana abangamankazana bayaswela amathuba okuzibonakalisa kundawo ezinengi, kodwa imncintiswano yenguqu enjenge COPA Coca Cola inikeza ithuba lokuthi abantwabethu baveze ithalenta labo.”
Emazweni afana leKenya kubikwa nyakenye bekulamathimu amantombazana edlula 200 aphatheke kulinkezo.
Abanqobi balonyaka, njengenhlalayenza, bazanikezwa ithuba lokuya mela iZimbabwe kumqhudelwano weAfrica ozahlanganisa amazwe abalisa iKenya, Uganda, Tanzania, Ethiopia, Angola, Mozambique, Zambia, Malawi, Botswana, Namibia, Rwanda, Congo, Swaziland, Nigeria leSouth Africa.
Online Reporter