admin
YiNtatheli kaMthunywa
UHULUMENDE unxusa abafundi abafisa ukuqhubeka ngezifundo zabo ze-undergraduate kunye le-post-graduate emanyuvesithi aseRussia ngomnyaka ka2022/2023 ngaphansi kohlelo loPresidential Scholarship Fund ukuthi bathumele incwadi zokucela ukwamukelwa kuhlelo lolu.
Usizo lwemali yezifundo lolu luhlose abafundi abaswelayo kodwa abakhaliphileyo ezifundweni zabo abavela ezikolo ezisemaphandleni.
Kusitatimende, iwofisi kaMongameli kunye leKhabhinethi iveze ukuba labo abafisa ukwenza izifundo ezingayisizo zeSayensi kumele babe bethole imiklomelo ephezulu kwengu-10 kuzifundo ze-A-Level kuzifundo ezihambelana lesiqu (degree) abayabe befuna ukuyasenza njalo umfundi lowo kumele abe eleminyaka engaphansi kwengu-25 mhlaka 31 Mpalakazi 2022.
“Labo abafaka izicelo zokwenza iziqu zakuqala zeScience and Technology kumele babe bethole u A loba u B kuzifundo zeSayensi ze-A-Level.
“Labo abafisa ukwenza iMasters le PhD kumele babe bethole i-first class loba i-upper second class degree kuzifundo abafisa ukuyazenza.
“Abafundi beMasters bona kumele babe leminyaka engaphansi kwengu-35 kuthi abe PhD kumele babe leminyaka engaphansi kwengu-45 kusiyafika umhlaka 31 Mpalakazi 2022,” kutsho isitatimende leso.
Izifundo abafundi abangayazenza zigoqela ezobumanjinela, ezempilakahle, ezeSayensi, iSayensi ejwayelekile kunye leSayensi yezokulima.
Ezinye izifundo ezingaphansi kwezobumanjinela zigoqela ezokuhlola (surveying), ezokwembiwa, ubunjinela bamakhemikhali kanye lezamagetsi, kuthi labo abangaphansi kwamaSayensi ezempilakahle bangenza ikhemisi (pharmacy), iSayensi yezifuyo kanye le- physiotherapy.
AmaSayensi ajwayelekile wona agoqela i-Sayensi yokwakheka komhlaba (geological sciences), geo-information kunye le-meteorology kuthi kuSayensi yezokulima kule-horticulture, ezeSayensi yomhlabathi kanye le-Winery.
Labo abafisa ukuncediswa ezifundweni zabo kumele babhale incwadi yesicelo besitsho ukuthi bafisa ukwenza ziphi izifundo ze-undergraduate loba i-post-graduate degree njalo besitsho izinqumo ezimbili.
Online Reporter