admin
YiNtatheli kaMthunywa
UMNCINTISWANO womdlalo wethenisi koBulawayo kumele ugoqele abadlali abasakhulayo abanengi ukwenzela ukuthi kulolongwe abadlali abazamela isizwe kwelizayo, kutsho ingcitshi yezokuqeqetshwa kwalumdlalo.
Abaqeqetshi bakoNtuthu bakhuthazwe ukuthi batshiyane lomkhuba wokudinga abadlali asebekhulile kodwa babe lenhlelo ezizakwenza kube lula ukuthi basondeze okhekhe eduzane.
Ingcitshi kwezokufundiswa kwethenisi uThesly Mufunda ubikele iphephandaba likazulu ukuba okumqoka kungqubekela phambili yomdlalo wabo yikusebenza labantwana abalothando lethalenta.
“Akula eyinye indlela ngaphandle kokuba sifundise abantwana abasakhulayo umdlalo. Akuncedi ukuthi silolonge abadlali abaphezu kweminyaka engu-16 yokuzalwa, sitshiya labo abathembisa ikusasa elihle emdlalweni,” kutsho uMufunda.
UMufunda ubike lokhu esethula umbono wakhe ngempumelelo eyenziwe kumncintiswano omkhulu weMakhandeni Open Tennis Championships.
“Imincintiswano enjengale iyanceda ukuthi sibone isibanga esikuso njengenkokheli labaqeqetshi bomdlalo.”
Abanqobi kumncintiswano lo babalisa uTheofelus Ngwenya, uIsaac Moyo, uPamela Moyo, uMqedisi Sithole, uMakanaka Whata, uDolorrence Hove, uZamani Moyo loZinhle Jiyane. Umncintiswano lo ubuhlanganise abadlali abasuka kumathimu asabalale isabelo sakoBulawayo sonke. Bekuncintisa abafana lamankazana abangamatshumi amahlanu lane kumahlandla abeleminyaka yokuzalwa engaphansi kwe-10, 12 le14.
Umdlalo wethenisi koBulawayo usuthole usekelo kumankampani abalisa iMediHealth, iRoyal Club of Khumalo, iLobels, iServe 4 Africa lezinye.
Online Reporter