admin
Isinkwa yikudla okuthandwa ngubani lobani abantwana, abadala ngitsho ogogo labokhulu. Kanti-ke ukuthi sikwazi ukuzenzela lesisinkwa esithandeka kangaka kuyadingeka njalo kuqakathekile.
Nanku okunye, ozenzele sona sitshiphile lobunandi baso buphezulu.
Abantu bomhlaba wonke bayasidla isinkwa, abanye bayaziphekela njalo abanye basithenga ezitolo sesiphekiwe.
Izinto okufanele uzazi mayelana lokubhaka isinkwa:
Kulamabele alinywayo okuthiwa yingqoloyi lakhonapha kwelakithi ayalinywa ngabalimi abanengi emapulazini.
Angavunwa ayagaywa impuphu ethiwa yifulawa elemikhakha emibili emhlophe lelithuthuva.
Kuthiwa lesi esilithuthuva silokudla okunengi okwakha umzimba. Nxa uthenga ifulawa lezi qaphelisa ngoba zimkhakha emibili eluthuthuva (whole wheat) lengeyengqoloyi engahlutshulwanga, besekusiba lemhlophe nke.
Le-ke ngehlutshiweyo.
Eminye njalo imehluko kufulawa yile:
Ikhona eyokupheka izinkwa, ikhona eyokupheka amakhekhe kube khona njalo ethengwa ilemvubelo kanti eyinye iyabe ingela.
Wena-ke tshela abathengisi umhlobo owufunayo nxa usuthenga bazakupha wona.
Imvubelo
Lazo imvubelo ziyimikhakha eyehlukeneyo.
Ikhona i-baking powder, ikhona i-yeast kanye legwebu lotshwala elonyiswe ngokuchaywa.
Okuhle kwakhona yikuthi ezinengi zalezi imvubelo ziyatholakala ezitolo ngemali elingeneyo.
Ukugcina ifulawa lemvubelo
Beka ifulawa yakho endaweni eyomileyo kumbe ikhabothi, bona ukuthi yomile njalo isegabheni elivalekileyo.
Ungayibeki phansi kwezinto ezilephunga njengesepa lepharafini.
Imicijo okumele uyikhumbule
-Ukugeza izandla ukhuphe lezindandatho ungakavoxi inhlama yokwenza isinkwa.
-Ukuvoxa okwemizuzu elitshumi.
-Ukungenzi inhlama yakho iqine kakhulu ngoba kungenza yehluleke ukukhukhumala.
-Nxa usuvubile inhlama ngemvubelo ibeke endaweni efudumalyo hatshi, etshisayo kumbe eqandayo.
-Nanzelela ukukhukhumala kwayo.
-Khathesi vubavuba inhlama phezu kwepulanka elivuvuzelwe ifulawa.
-Ifake egabheni lokupheka isinkwa ubusufaka ku-oven etshisa okungaba yi400 degrees ubususehlisa iye ku-350 degrees.
-Ukuvuthwa kwesinkwa kungathatha imizuzu esuka kumatshumi amathathu kusiya kumatshumi amane.
Nxa sesivuthiwe siyaxega egabheni sibe lombala omuhle oluthuthuva. Zidlele ukholise.
Online Reporter