admin
Nkosilathi Sibanda
INHLANGANISO yeZimbabwe Golf Association (ZGA) isikhethe ithimu yamalunga amane, ezakuyamela ilizwe leZimbabwe, emncintiswaneni wenkezo yeAfrican Golf Confederation Cup (AGC) kweleZambia, kuyonale inyanga.
Kubikwa umncintiswano wenkezo le uzaqhutshelwa edolobheni leKitwe, eNkana Golf Club kweleZambia kusukela mhlaka 27 wayonale inyanga kuze kuyefika mhlaka 3 kunyanga ezayo.
UThembelani Vundla, uRobson Chinhoyi, uTonderai Masunga kanye lo Visitor Mapwanya yibo abazabe bemele ilizwe leZimbabwe.
Kuzwakale ukuthi kulamaqembu alitshumi lanye azaphatheka emncintiswaneni walonyaka njalo amazwe la abalisela i-Angola, Malawi, Zimbabwe, Botswana, Tanzania, Kenya, Tunisia, Mozambique, Uganda, Zambia, Mauritius Kanye le Namibia.
UThembelani Mvundla ubikele iphephandaba leli ukuthi uyaziqhenya ngokukhethwa kwakhe ukuthi ayemela ilizwe leZimbabwe emncintiswaneni lo ngakho uzimisele.
“Umncintiswano lo siyawuqakathekisa kakhulu njengenzalo yeZimbabwe ngakho sikhangelele ukuthi sifike sinqobe khonale eZambia,” kutsho uMvundla.
Ababona ngezokuphathwa komdlalo wegalufu kuleli uObert Dube ongumsekeli kamongameli wenhlanganiso yeZGA, uveze ukuthi ilizwe lakithi selenze amalungiselelo amakhulu kumdlalo lo ngakho kulemali engange $400 000 ezasetshenziswa ukuze kuqhutshwe umdlalo lo.
Kubikwa njalo umncintiswano walonyaka ungavaleli muntu phandle ngoba amazwe angaphandle kwe-Africa lawo evumelekile ukuphatheka emncintiswaneni lo.
Online Reporter