admin
Ncekwenhle Ncube
ISIKOLO seTsholotsho High sesivule indawo yokulima bethelezela (i-irrigation) ezaphathisa ngokudla esikolo lesi njalo izasetshenziswa kakhulu ngabafundi abafundela izifundo zokulima ngoba bezazuza ithuba lokuphatheka ekulimeni izilimo ezitshiyeneyo.
Kubikwa ngoLwesihlanu isikolo seTsholotsho High sizaba njalo silomkhosi wokupha abafundi abenze kuhle kuzifundo ezitshiyeneyo lakwezemidlalo izicoco.
Kusenjalo nje umphathisikolo uMnumzana Sicelo Dube ubikele iphephandaba likazulu ukuthi bona njengesikolo bebambisana labazali bakulesi isikolo bazathatha lelithuba ukuvula i-irrigation yabo ngokusemthethweni.
“NgoLwesihlanu sizabe sisipha izicoco abafundi. Ngosuku olufanayo sinxuse abazali ukuthi babekhona ngoba kuyilo ilanga esizavula i-irrigation yethu ngokusemthethweni.
“Besesiqalile ukulima isivande lesi kodwa besekusele ukuthi sivulwe ngokusemthethweni. Lokhu sikwenzela ukuthi abazali bazizwe labo belomlandu njalo baphatheke kuntuthuko yesikolo,” kutsho uMnu Dube.
“Izilimo esiyabe sizilima ezinye zazo sizakuyazithengisa emkambo koBulawayo sihlose ukuthi sizuze imali ezasiphathisa ukuthuthukisa isikolo sethu,” nguMnu Dube lowo.
Izilimo ezikhangelelwe ukulinywa lapha zigoqela ingqoloyi, umumbu amagwili lamatamatisi lezinye ezehlukeneyo.
UMthunywa uzwe ukuthi ngaphandle kokuthengisa ukuze bathole inzuzo isikolo lesi sizenelisa ukuthola ukudla kwabantwana abafunda behlala esikolo okutsho ukuthi indleko zokuyathenga ukudla zizakwehla.
Esikolo esifanayo kubikwa abafundi sebesungule iphurojekithi yokufuya inkukhu zamaqanda lezokudla.
Kubikwa kulenkunku zamaqanda ezifika 350 kuthi ezokudla zifika-500. Lezi inkukhu zikhangelwa kakhulu ngabafundi abenza izifundo zokulima lokufuya.
Ngaphandle kokusiza abafundi iphurojekithi le iphathisa abafundi ukuthi babe lolwazi ngemisebenzi yezandla abalakho ukuziphilisa ngayo njengoba ilizwe lakithi ligxile kwezokulima.
Online Reporter