admin
Thokozile Mbedzi
ZILOKHU zitshwaqe umzimba izakhamizi zesigabeni sePatana ngaphansi kwenduna uMarupi ngemva kokuba enye indoda yenze insindabaphenduli yendaba nanko phela ihlahlele umkayo ikhanda ubuchopho bagcwala phansi, yasithatha ibhemba yaquma izandla lenyawo qede yazibophela ngoMvulo kuyonale iviki.
UDaniel Setoboli oleminyaka yokuzalwa engu-75 uhlahlele unkosikazi wakhe, uViolet Ncube obeleminyaka yokuzalwa engu-53 ngebhemba wasethatha ihloka wamhlahlela ikhanda ubuchopho bagcwala phansi.
Omunye umakhelwane okhulume loMthunywa uMnumzana Boithabelo Ncube uthe njengabomakhelwane balesithuli njalo kunzima ukuzwisisa ukuthi kuyini okubangele ukuthi uSetoboli enze isihluku esingaka.
“Kuyasethusa njengezakhamizi lokhu, asazi lokuthi kufikeni kuSetoboli, ngoba uvuke ekuseni babopha inqola besiya eSebasa Irrigation Scheme eThuli belomntwana oleminyaka engu-15 ongumfana.
“Bathe sebesendleleni eMankonkoni uSetoboli wathi bamise inqola balungise amahanisi lakanye umfana wamisa inqola yikho ukukhipha ibhemba wageca unkosikazi wakhe. Ababili laba bebe ngomasihlalisane,” kutsho uMnu Ncube.
Uqhubekele phambili esithi ebusuku ababili bake bazwakala bexabana.
Kubikwa uSetoboli wahwatsha ibhemba wageca umkakhe izandla lenyawo wawela enqoleni ngemva kwalokho wathatha ihloka wamhlahlela ikhanda ubuchopho bagcwala phansi.
Kuzwakale ukuthi ngesikhathi uSetoboli esenza lokhu umfana ababelaye wayelokhu ephethe emtshaya ngamatshe kodwa yena eqhubeka angathi ngumuntu osefikelwe lidimoni.
“Umfana lo wazama ukuthwala unina ngenqola kodwa unina wathi akusancedi ngoba usezifele njengoba engasela zandla lenyawo,” kulandisa uMnu Ncube.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uthe solufikile ehofisini labo ngakho uzulu nxa elohlupho kabikele amapholisa.
“Udaba lwendoda ebulale umkayo solufikile ehofisini yethu ngakho uzulu nxa elohlupho kayazise amapholisa loba abaphathi bezigaba ukuze singalahlekelwa yimpilo mahlayana njengalokhu,” kuphetha uInsp Mangena.
Online Reporter