Online Reporter
Nkosilathi Sibanda
UKUTHUNGA ingcebethu, amacansi lezinye izitsha sekuthuthukise omama abangaphansi kwenhlanganiso yeLupane Women Development Trust (LWDT), nanko impahla yabo isithengwa phetsheya kwelizwe.
Sebelokuzithemba njengabosomabhizimusi ngoba imisebenzi yabo yezandla isikhwabithwa ngabathengi abasemazweni ase-Africa, kuzwekazi le-Europe lakwezinye indawo. Ukuthengwa kwempahla le, sekwenze ukuba omama laba bakhe izindlu, bathenge impahla eyehlukeneyo emizini yabo lokubhadala indleko zabantwana besikolo.
Okuhle ngalokhu yikuthi, inengi labomama beLWDT sebenelise ukukhuthaza labanye abesifazane ukuthi bakhuthalele imisebenzi yezandla ebalisela ukuthunga izitsha besebenzisa amalala. Ukuvuleka kwemikambo yaphetsheya, kuphendle njalo lamathuba okwazana lamankampani agxile kwezokuthengiswa lokukhankasa ngempahla elungiswa kuleli.
Kulandela ukusebenza kuhle kwabomama beLWDT, kulabesifazane abathethe inyathelo lokwenza ngokufanayo esigabeni seBinga laseTsholotsho ngaphansi kweMatabeleland Handicrafts Association.
Esigabeni seBinga kuleZubo Crafts, eTsholotsho kuleNgwenyama Handicrafts.
Kubikwa lakulezi izigaba omama sebephakamise impilo zabo ngokuthunga.
Umqondisi weLWDT uNkosikazi Hildegard Mufukare, ubikele intatheli yeZimpapers ngoLwesibili emini ukuba ukuvuleka kwendawo zokuthengisa emazweni aphetsheya sokwengeze inzuzo yabo, kwaguqula lempilo zamalunga enhlanganiso yabo.
“Eqinisweni, inengi lethu selisenelisa ukugcina imuli zabo. Abanye bethu bathenge impahla, babhadala lemali zabantwana besikolo. Omama sebebambe izimuli ngalesi isikhathi. Sibonga ukuthi eminyakeni edluleyo kube lokuvuleka kwemikambo, sincediswa nguHulumende lengatsha ezibalisela iZimTrade. Lapha sikhuluma ngokuthi impahla yethu isikhona njalo ikhwabithwa emazweni akuzwekazi le-Africa lakwele-Europe,” kutsho uNkkz Mufukare.
Uqhubeke wathi: “Ukukhula kwethu eLupane Women Development Trust sekudale ukuthi labanye omama kwezinye indawo bathathele phezulu imisebenzi yezandla, egoqela ukuthunga ngelala esikwenzayo eLupane. Sekuvuke iZubo Trust eBinga, iNgwenyama Crafts eTsholotsho lezinye inhlanganiso. Phezulu kwalokhu, inhlanganiso zabomama ezemisebenzi yezandla le, isingaphansi komanyano weMatabeleland Handicrafts Association, okutsho ukuba kulokukhula kumsebenzi esiwenzayo.”
UNkkz Mufukare ukhuthaze njalo ukuthi abasakhulayo abesifazane baqakathekise imisebenzi yezandla ngoba iyathuthukisa njalo iyaqinisa umzimba.
“Silobufakazi obuqinileyo, obusegcekeni ukuthi ukuthunga izitsha kuyabhadala. Abantwabethu abathathele imisebenzi yezandla phezulu.
“Sikhuluma nje lapha eLupane bakhona abanye bethu asebethenge izindlu, abanye baqale ukwakha, bethenga impahla zakulezi insuku. Konke lokhu kwakungeke kwenzeke kudala. Omama sebencedisa obaba ukugcina imizi bethenga impahla. Ngithi kasisukumeleni phezulu, senze imisebenzi yezandla bomama,” nguNkkz Mufukare lo.
