Online Reporter
Ugwalo: Emfuleni Wezinyembezi olwalotshwa nguEzekiel S K Hleza
Ophezulu Stinta
Ngeviki edlulileyo sitshiye uSpinoza esenze inkalakatha yesimanga, esuke lendizamtshina ethwele izigila mkhuba zokucina ezazilindwe ngamehlo abomvu esigodlweni. Amaqhawe eganga angena ngothando lomhlabathi, angena ngothando lwabafo lapho sikhangela indlela abayihambileyo, ubunzima abadlule kubo.
Babongwa ngubani ngokuzinikela okungaka abakwenzayo bezinikela ngempilo zabo, benikela ngemiphefumulo. Kwakungasilo daba olulula lolu olwenziwe nguSpinoza, uMgandane owayelindwe ngamanqe wayesemlethe phakathi kwabafo ephila.
UMlingiswa lo nxa simkhangela sibona ingcitshi yamagama, indoda ekhaliphileyo ebuchotshweni lapha. Okunye njalo esikunanzelela ngomlingiswa lo, wayelesibindi esiphindiweyo, kambe wayengesabi lokuthi ukhona omunye owayengamnanzelela ukuthi kukhona okwakutshaya amanzi ngaye lapha, owayengavele nje amsusele amanqe, kwakuthatha isibindi sendoda ukwenza lokhu.
Okunye njalo esikunanzelelayo, luthando lweqiniso. Kambe lungekho uthando lweqiniso, kuyini okwakungafuqa uSpinoza ukuthi athathe izinqumo ezinkulu kangaka kuphela nje ngenxa yokufisa ukusiza umngane, umfo abahlanganiswa yikulwela umhlabathi, kukanti yena Mgandane lo umfowabo wamkhethela elokufa ukuthi ayedliwa ngamanqe kungekho nje lokuthi thika ngaphakathi kwakhe, kodwa sibona uthando lalo ongazalwa laye ofika kusigaba sokunikela langempilo yakhe ukuthi uMgandane kafe sekuzanywe wonke amaqhinga, kwehlula.
Isimilo sokugcina, imfihlo, sisibona njalo sidlala indima enkulu kakhulu kulesi sigaba, izifuba ezakhatshwa lidube kazifuneki nxa kunje ngoba lamacebo abotshwayo alakho ukuzwakala emidulini avele amuke lomoya.
Bamhlonipha uSpinoza, abafowabo bamhaya bamcoma okwamagama ngobuqhawe abenzileyo. USpinoza wabazisa abafo ukuthi phakathi kwendizamtshina lapha kwakule sitha, ngakho kwakungavumi ukuthi bakhululeke kakhulu, kanye lalaba abangababo, masinya nje ngokuphazima kwelihlo yahanqwa indizamtshina, izikhali zonke zikhangele ngakuyo, kwakungakhathalekile ukuthi isitha ngumuntu oyedwa kuphela ohanqwe litshumi, isitha yisitha, imibhobho yavela yakhokhwa ukuthi lapho nje kusiba lokunyakaza okuthile uhlamvu lwalukhala. Umuntu wonke owayephakathi kwendizamtshina wabizelwa phandle kwathiwa kaphume, baphuma bonke bethwele imikhono ekhanda.
