admin
Intatheli KaMthunywa
BAYEHLULEKA ukuyinqoba iTalen Vision esivule isikhala esingeke savalwa ngelinye iqembu kuhambo lwayo lokuya enkundleni zePremier Soccer League ngesizini ka-2020.
ITalen Vision isiseduzane lokubizwa intshantshu yebhola likaDivision One ezansi yelizwe. Abadlali bakamqeqetshi uMkhuphali Masuku bavule isikhala semiklomelo eyisithupha bekhokhela ingalane belemiklomelo engu-52.
Amakhosi Amahle akunombolo yesibili.
Kumidlalo engamatshumi amabili lambili, uMasuku abadlali bakhe abakezwa ukudliwa.
Ngokuhlaziya isimo seligi, kusobala ukuthi nxa iTalen Vision inganqoba ngoLwesihlanu, izabizwa intshantshu kaDivision One.
Ekhuluma loMthunywa kuliviki uMasuku uthe utshele abadlali bakhe ukuthi bengatatazeli.
“Umdlalo wethu leBulawayo City ufana layo yonke imidlalo. Akula qembu esilifaka phezulu ngoba sincintisana lawo wonke. Abadlali bethu kuzamele bafake ibhola phansi, bedlale umdlalo wabo esiwaziyo,” kutsho uMasuku.
Ngomnyaka odluleyo leliqembu kwakukhangelelwe ukuthi leqe umzila lingene kuligi ezwayo kodwa lakhutha ugatsha kancane.
Kumasizini amabili adluleyo iTalen Vision yilo iqembu elithola udumo ngethalenta elilalo nanko phela abadlali balo bebehlohla ukwedlula abamaqembu amakhulu kuleli.
Impumela edluleyo:
Talen Vision 3-1 CIWU, ZPC Hwange 0-0 Bulawayo City, Motomoto 2-1 Makomo, Ajax Hotspurs 0-1 Bosso 90, Mainline 0-3 Casmyn, Binga Pirates 1-0 Indlovu Iyanyathela.
Online Reporter