admin
Wayne Ncube
UMHLABELELI wakuleli okweleSouth Africa owaziwa kakhulu ngokuthi nguMba Tapela usephekele abalandeli bakhe enye imbabazane yedlalade akhangelele ukulethulela uzulu ngoMgqibelo.
Idlalade likaMbakisi Rowan Tapela elitsha elithi Ingqavungqekethu limumethe ingoma eziyisikhombisa njalo ezimbili zakhona ngezolimi lwesiKalanga.
Kudlalade lakhe leli, aqale ukulipheka ngenyanga kaZibandlela, uhlose ukufundisa kanye lokududuza uzulu ngobunzima bempilo ukuze aqhubekele phambili.
Ekhuluma loMthunywa uMba Tapela uthe ingoma zakhe uzipheke ngobunono obukhulu njalo ingoma zakhe zigudla iguma ngezehlakalo asedlule kuzo empilweni.
“Kungoma ethi Ingqavungqekethu ngikhuluma ngesimo engibhekene laso sokuncindezelwa ngabantu kodwa lokho ngiyakwamukela ngoba kuyangiqinisa njalo kuyangifundisa impilo ukuze ngibe ngcono,” kutsho uMba Tapela.
Wengezelele wathi izimo adlula phakathi kwazo ziyamqinisa.
“Amatshe elingiphosela ngawo angeke ngalikhanda ngawo lami khepha ngiyawadobha ngakhe ngawo izitepisi zempilo ngibuye ngiphakame ngazo. Lapha ngizama ukunika abantu isibindi sokuba lanxa bebhekane lenzondo kabayisebenzise ukuphumelela,” kuchaza uTapela ngedlalade lakhe.
UMba Tapela sewapheka amadlalade amane athi Odumengakho kweza elithi Ngiyazisola ngemva kwalelo kwalandela elithi Zidibene vol 1 loZidibene Vol 2 kukanti kulamanye njalo awapheka labanye abahlabeleli abagoqela uMxolisi Mr Bones, Mduduzi Golide loMartin Tjehanga.
Uthe izikhathi ezinengi usebenzisana labanye abahlabeleli ngoba kumnika ulwazi ngendlela zokujabulisa abalandeli.
Uthe okwakhathesi ukhangelele ukusebenzisana labahlabeleli bezokholo, i-reggae, maskandi kanye le-disco.
Uphethe ngokubonga abahlabeleli abafana loAbednico umkhokheli weqembu leQhubekani Super Stars, uModias Chauke uObidiah Matulana labanye asebenzisane labo kudlalade lakhe.
Online Reporter