admin
Johas Moyo lo Buhlebenkosi Gaule
BATSHO beqinisile abadala ukuthi okungapheliyo kuyahlola. Namhlanje izakhamizi zeSigodini sezikhomba ngophakathi kulandela kutholiswa kwazo impahla yokudonsa amanzi (iPiped water system) yinhlanganiso yeZimbabwe Community Development Agency.
Izakhamizi lezi bezithwele luklubhu nanko phela amanzi beziwahambela umango omude njalo zinatha amanzi angahlanzekanga kulandela ukuthi akhiwa emfuleni lapho izifuyo lazo ezinatha khona.
Izakhamizi bezithe gwaqa kuviki ephelileyo kuvulwa ngokusemthethweni loluhlelo njalo uSikomitshi uBekithemba Ndlovu kanye lenduna uSigola bebengabahlonitshwa.
Uhlelo lolu olwaqala ngenyanga kaMfumfu nyakenye lukhangelelwe ukuthi lusebenzise amandla elanga ukudonsa amanzi emgodini.
UMnu Ndlovu ubike ukuba loluhlelo luzasiza izakhamizi zeSigodini ikakhulu ezeSikhoveni ngoba bezakwenelisa ukuthola amanzi ahlanzekileyo.
“Njengoba sonke sikwazi ukuthi isigaba sethu lapha eSikhoveni besithwele nzima kumele siyiphathe ngonanzelelo limpahla ukuze ingafi masinyane ngoba sizabuya sikhale futhi,”
UMnu Ndlovu ubike njalo ukuba izakhamizi asisoze zenelise ukusebenzisa amanzi la ezivandeni ngoba engawokunatha kuphela.
“Sikhangelele ukuthi uhlelo lolu lwenze inguquko empilweni zethu,” kuchaza uMnu Ndlovu.
UMnu Winston Mathabela ongumqondisi wenhlanganiso yeZCDA uveze ukujabula okukhulu ngaloluhlelo.
“Ngilethemba lokuba isigaba se Sikhoveni sizaba lendlela enhle yokulondoloza amanzi abo angapheli masinyane njalo sibakhuthaza ukuthi abantwana bengadlalisi amanzi njalo kungabulawa impahla edonsa amandla elanga.
Akube lamacebo okulinda kuhle amanzi abo iphurojekithi leyi ikhangelele ukuthi ihlale okweminyaka elitshumi lanhlanu,” kutsho uMnu Mathabela.
UMnu Ndlovu uphethe ngokuthi ulokukholwa ukuba loluhlelo luzaphathisa kakhulu labomama labantwana abangamankazana ngokuba bengabe besahamba umango omude besiyadinga amanzi okunatha khatshana ngoba ayabe eseziphumela empompini.
Online Reporter