UMBONO: Ngumoya bani osungene kuzulu?

KWENZAKALANI kanti kulezinsuku abantu bengasesabi ukubulala. Mihla lamalanga sibala indaba zabantu abahlahlelanayo kumbe baklinye omunye umuntu kungabi ndabazalutho. Ukuchitha igazi abantu sebekwenza into elula, sebekufanisa lokubulala inkukhu. Kanti umphefumulo womuntu yinto encane yini angithi nje iBhayibhili elingcwele liyakufakaza kumithetho elitshumi  ukuthi ukubulala kuyisono.

Amaphephandaba kulezinsuku abhala njalonje ngendaba ezihlasimulisa umzimba. Kubikwa ngendaba zokubulalana ngezizatho ezingazwisisekiyo. Kuyonale iviki sibale ngendaba yesinye isizalwane sakuleli esilahlekelwe yimpilo yaso sikwelinye ilizwe esakhelane lalo. Lokhu kudabulisa inhliniziyo ngoba abomdeni balemibuzo eminengi ngokufa komunye wabo nanko phela lakhathesi amapholisa asadingisisa ukuthi kungab e kungubani obulele lumama obezihambela nje enganaki lutho.

Okusuka kujinge uzulu aswele lempendulo yikuba abanye ababulalayo basuka babulale lezithandwa zabo, kambe umuntu omthandayo umbulala njani? Umbulala njani umuntu owamthathayo wamthembisa izulu lomhlaba?

Kuyadabukisa lokhu ngoba phela nxa umuntu owakuthembisa ukukuthanda lokukuvikela eseyakuba yisitha esiphakamisa umhedla sikugwaze kubizwa kuthiweni.

Kunga ngumoya bani osusenza abantu bangabi lomzwangedwa ekubulaleni. Nxa kuyimali edingakalayo, iyavela ngaphi lawe mabulala ungelayo.

Amapholisa kawaqinise umthetho ikakhulu emngceleni welizwe ngoba zinengi izikhali ezingena kuleli. Nxa kuyikuthi kulalapho eziphuma khona  akuchwayisiswe kubotshwe amabhawudo kwazakale ukuthi ziphuma njani njalo labobani.

Ilizwe lethu belingelinye lamazwe alokuthula ngoba lenelisa ukuqoqa izikhali ngesikhathi kuvelwa empini. Pho lezi izikhali esezivumbuluka zivelela ngaphi?

Akuthathwe amanyathelo ngoba okwenzakala emazweni angentshonalanga, iBoko Haram asikufuni, singabantu abafuna ukuhlala ngoxolo langokuthula.

Asixekaneni lokuchitha umphefumulo mahlayana. Nxa engumkakho esekwehlule kungcono umbisele kwabo njengokumthatha kwakho.

Umphakathi nxa ungasebenzelana lamapholisa izigilamkhuba lezi zilakho ukuthi zibotshwe ngokuphangisa.

Amapholisa adinga ukuncwetshwa indlebe ukuze abophe zonke izigangi kodwa umphakathi ungakufihla kusasa kuzehlela bona.

Udlame alwakhi isizwe kodwa lubisela emuva intuthuko.

Amapholisa ezigaba kawavuselelwe ngoba ayaphathisa lawo ekulwisaneni lodlakela olubakhona lapho esihlala khona.

Nxa engaba khona alakho ukubona masinya izigangi njalo aphathise ekubotshweni kwazo.

Kungumbono waleliphephandaba ukuthi nga uzulu usebenzelana lamapholisa ukuze kuqedwe ububi emphakathi.