Sikhumbuzo Moyo
IZAKHAMIZI zeTsholotsho, izinduna labakhokheli bomphakathi sebehlangene kumizamo yokusungula umsakazo ozanceda ukuvala isikhala sokutholakala kolwazi lemibiko kulindawo.
Umsakazo lo, ozabizwa ngokuthi Zhowane FM, ulindele imvumo yeBroadcasting Authority of Zimbabwe (BAZ) ukuze uqalise ukusebenza.
Umsakazo lo, uzakuba lomlandu omkhulu wokuthuthukisa umphakathi, ukulondoloza amasiko kunye lelifa lethu, ukusekela imfundo, ukukhuthaza amathalenta akulindawo lokunikeza abalimi ulwazi oluqakathekileyo lwezokulima.
Umgcinisihlalo wokuqala webhodi yeZhowane FM, njalo engumphathisikolo weTsholotsho High School, uMnumzana Sicelo Dube, uthe umqondo wokusungula umsakazo lo wavela ngokusebenzisana komphathi wesigaba seTsholotsho (District Development Coordinator), izinduna lezakhamizi ezabona ukuqakatheka kokuba lomsakazo ozancedisa kundingeko zomphakathi.
“Umqondo wavela kuDDC, izinduna lezakhamizi ezabona ukuthi iTsholotsho idinga umsakazo wayo ozanceda ukuvala isikhala solwazi njalo unike abantu ithuba lokukhuluma ngezinto ezithinta impilo zabo,” kutsho uMnu Dube.
Uthe umphakathi ususungule ibhodi njalo usufake isicelo kuBAZ sokucela imvumo yokusungula umsakazo.
“Sesifake isicelo kuBAZ njalo iziphathamandla zebhodi sezike zavakatsha eTsholotsho zahlangana. Sesikhethe lendawo lapho okuzakuba lamahofisi omsakazo. Khathesi silindele imvumo ukuze siqalise ukusakaza.”
UMnu Dube uthe iZhowane FM izaqakathekisa inhlelo ezinanzelela indingeko zezakhamizi njalo ikhuthaze ukulondolozwa kobuntu lamasiko esigaba.
Uthe umsakazo lo uzasebenza njengenkundla lapho abantu abazaxoxa khona ngezindaba zentuthuko, babelane ulwazi njalo baphakamise imibono yokuthuthukisa indawo yabo.
Uthe bazasebenzisa umsakazo lo ukufundisa abatsha ngamasiko ukuze angatshabalali, besebenzisa inganekwane, ingoma, imidlalo lemigido yesiNtu.
“Amasiko ethu aqakathekile njalo sifuna ukusebenzisa umsakazo ukufundisa abatsha ngemikhuba yethu. Ngezinganekwane, ingoma, imidlalo lokugida kwesiNtu. Sifisa ukuvuselela lokulondoloza amasiko ethu,” kutsho uMnu Dube.
Uthe iZhowane FM izanika njalo abaculi labanye ithuba lokwethula amathalenta abo ukuze umsebenzi wabo ubonakale.
Kwezokufunda, umsakazo lo uhlele ukusakaza izifundo zabantwana besikolo ukuze bancediseke kuzifundo zabo, ikakhulu labo abangelawo amathuba.
