adminCornelius Luphahla
IMADOLO nzima imuli yakoNgwenya esigabeni seLihlo, eLupane ngemva kokuba omunye wale imuli efe kabuhlungu ngokunatha ithothotho okucatshangelwa ukuthi yayiphekwe yahlanganiswa le fethilayiza.
Imbedumehlwana le yenzakale emavikini amabili adluleyo lapho uJustice Ngwenya ohlala ngaphansi kukasobhuku uMishek Nyathi ovakatshele koyisekazi eZijimi wafika wanatha ithothotho emzini oyaziwa ngokupheka kakhulu okwaziwa ngokuthi kukoDandanda.
UMthunywa uxhumane lesinye isakhamuzi sakule indawo uMnumzana Muzobanzi Mangena oveze ukuthi kuliqiniso ukuba uMnu Ngwenya wabulawa yithothotho.
“Kuliqiniso sibili ukuthi uNgwenya wabulawa yithothotho ngoba lami ngangikhona ngalelolanga eyinatha abantu bemkhuza ukuthi engayinathi kakhulu ngoba iyingozi emzimbeni yena waba lenkani.
“Kuthe kusiyakhwela ilanga lakusasa sezwa kuthiwa uNgwenya kasekho ngahle ngazi ukuthi ubulewe yithothotho.
Isimanga yikuthi abantu bonke esigabeni bayakwazi ukuthi ithothotho le iphekwa ihlanganiswe lefethalayiza kodwa asazi ukuthi kungani bengayekeli ukuyanatha khona. Uthola befola besiyakhonale besazi ukuthi into abayilandayo iyingozi emzimbeni womuntu. Ngikhuluma nje lakhathesi lokhu bengamanga ukunatha khona, bahlahla begcwele,” kutsho uMnu Mangena.
UMnumzana Melusi Ngwenya oyisihlobo sikamuyi ubikele intatheli ukuthi bona babona umuyi ngethuba isidumbu sakhe sesihanjiswe esibhedlela seSt Luke’s.
“Thina sasisazi ukuthi uJustice useZijimi kuyisekazi samangala sesisizwa kuthiwa usebhubhile ngemva kokunatha inkankabezi,” kuveza uMnu Ngwenya.
Usobhuku wakule indawo uMnumzana Solomon Luphahla uchaze ukuthi uyayazi indaba le.
“Kuliqiniso sibili ukuthi uJustice wabulawa yithothotho. Uma aopheka ithothotho elefethalayiza wathathwa ngamapholisa ahamba laye. Ngemva kokuhamba laye ngezwa kuthiwa wahlawuliselwa ukupheka utshwala lobu obungekho emthethweni,” kuphetha uMnu Luphahla.
Online Reporter