admin
YiNtatheli kaMthunywa
USWELA ubuthongo ebusuku lemini umongangeli weZimbabwe Football Association (Zifa) uFelton Kamambo ngokudinga icebo lokuthi ayikhiphe njani imali ebiza inkulungwane zamadola eMelika nanko amaqembu akuligi enkulu asebike ukuthi afuna limali injalo, ingama-yuwesi.
IZifa ithe amaqembu ePSL azabelana iUS$390 197, okutsho ukuba iqembu linye ngalinye lizathola iUS$5 000 kodwa imali le izabe isitshintshelwe kudola leZimbabwe.
IZifa yaphiwa iUS$1, 8 miliyoni.
Imali le iyingxenye yosizo oluvela kunhlanganiso ephethe inguqu umhlaba wonke iFifa kanye leConferation of African Football (Caf), njengemzamo yokuncedisa umdlalo wenguqu ngesikhathi segcikwane leCovid-19.
Umdlalo wenguqu kuleli imisiwe ngenxa yeCovid-19, osekubangele ukuthi abadlali bengaholi nanko amaqembu aphila ngemali ezivela kubabukeli bemidlalo enkundleni.
Kuthe kuphume umbiko walimali, kuvele ukuthi iqula lenkokheli yeZifa lifuna ukuthi linikeze amathimu lengatsha zayo isilinganiso semali yakuleli, ikakhulu iReal Time Gross Settlement (RTGS).
Amaqembu athe angeke kwenzeke ngoba ayayifuna limali injalo.
Isikhalazo esikhulu kumaqembu yikuthi iRTGS yimali ephela amandla ingakasebenzi ngakho isipho seFifa akumelanga sitshintshelwe kuloluhlobo lwemali.
UMthunywa uxhumane leziphathamandla zamaqembu akuPSL ezibike ukuba okufunwa ukwenziwa yiZifa kuzadala impi.
“IZifa ayifunde kumaphutha enziwa ngabanye ukuthi imali ezinje kumele zihanjiswe kuhle. Kanti nxa iFifa ibise iForeign Currency, kungani amaqembu engaphiwa injalo,” kutsho esinye isiphathamandla ngoLwesithathu kuviki ephelileyo.
UKamambo uthwele nzima ukuthi achasise ngenyathelo leZifa, kuthi isikhulumi seZifa uXolisani Gwesela utshele intatheli ukuthi imali yamaqembu izafika ngesikhathi.
Online Reporter