admin
YiNtatheli kaMthunywa
INHLANGANISO yeZimbabwe Football Association (Zifa) ihlekela esikhewini kulandela ukuvezwa kosekelo lwenkampani yeNetOne kumaWarriors kumalungiselelo omkhankaso weAfcon.
AmaWarriors aqale amalungiselelo emidlalo yeAfcon le ngoZibandlela.
Inkampani yeNetOne inceda iqembu lesizwe leli ngesikhathi inhlanganiso yeZifa ibika ukuthi ivele ayila ngitsho indibilitshi esikhwameni sayo.
Inhlanganiso le ibhekane lenqwaba yenhlupho zemali nanko phela iyehluleka lokubhadala abaqeqetshi kanye lokuqhuba inhlelo zokuthuthukisa inguqu.
Phambili kokuba iNetOne iphosele imali yayo, amaWarriors abephila ngokucela ebantwini ukuze iqembu lifeze imidlalo yayo.
Inkampani yeNetOne ayiqali ukwelula isandla kumdlalo wenguqu. Yiyo inkampani eyasekela inkezo yeEasy Call eyayidlalelwa ngamaqembu akuligi ephakemeyo eye-PSL.
Kulumnyaka, iNetOne yiyo njalo eyakhipha iZifa inhloni ngokubhadalela amatikiti abadlali bonke ngesikhathi amaWarriors esiyakhankasa kumdlalo wabo lesizwe seGabon.
UMongameli weZifa uPhilip Chiyangwa ubike ukuba ukuza kweNetOne kunikeza amanye amankampani ingqobe.
“Siyabonga ukuthi iNetOne isitshengisele ukuba iyinkampani elothando lomdlalo wenguqu. Lokhu yikuqala kobudlelwano obutsha njalo silethemba lokuthi lamanye amankampani azakwenza okufanayo.”
Online Reporter