admin
YiNtatheli kaMthunywa
LOBA kulamahungahunga athi umqeqetshi weTsholotsho FC uyasuka kuZiqholo zeZhwane, abasekeli labakhokheli baleliqembu baqina ngokuthi kayindawo.
ULizwe Sweswe usebukwe ngokuba ngumqeqetshi osehlale isikhathi eside ekhuza ithimu eyodwa kuligi yeCastle Lager nanko phela ubesenza umsebenzi lo kusukela ngomnyaka ka2010.
Udletshana olukhona luveza ukuthi amaqembu abalisa iBantu Rovers, iChapungu leFC Platinum asethumele abantu ukuthi bakhombise uSweswe.
USweswe laye uyakuvuma lokhu.
Umqeqetshi lo utshayelwe ihlombe kuliviki ngokugcina kwakhe umsebenzi kuTsholotsho FC lapho asekhuze imidlalo efika amatshumi amane. Andubana kuvele ukuthi uSweswe nguye umqeqetshi osehlale leqembu elilodwa okwesikhathi eside, ‘‘umiklomelo’’ lo ubuphethwe nguNation Dube oweHwange FC.
USweswe ungene kuTsholotsho FC ngomnyaka ka2010, waba ngumqeqetshi owancedisa ukuthi iZiqholo zeZhwane ukuze zibe yingxenye yeligi ephezulu eyePSL ngesizini ka2015. Kwathatha iminyaka emihlanu ukuthi akhulule iZiqholo zichinse ukudlala lengcitshi zenguqu yakuleli.
Ekhuluma loMthunywa ngoLwesibili, uSweswe ubike ukuthi uyajabula ngasekwenzile kuTsholotsho.
“Ngisuka khatshana lethimu le kodwa akulalutho esesivumelane ngalo okwamanje. Ngidumisa uSomandla ngokuthi sengenelise ukuqeqetsha ithimu elodumo okwesikhathi eside,” kutsho lumqeqetshi.
USweswe ubalelwa kubaqeqetshi ababukhali ekucupheni abadlali abasacathula kumdlalo wenguqu.
Inengi labalandeli bomdlalo limazi engumqeqetshi owayegxile kunguqu yabasakhulayo ikakhulu kumidlalo yenguqu yabafana abasakhulayo.
Kodwa, loba uSweswe ehlonitshelwa ukugcina umsebenzi eTsholotsho, isimo esikhangelane lethimu yakhe asijabulisi.
Ngesizini ka2015, ngesikhathi uSweswe echinsisa ukudla kuligi ephezulu, abafana beTsholotsho basinde kancane ukuphuma kusigaba lesi somdlalo.
Kusenjalo, uSweswe ubike ngokugcweleyo ukuthi uyabadinga abadlali bokwengezelela ithimu yakhe.
Iligi yeCastle Lager iphakathi kwefasitela lokuthengwa lokuthengiswa kwabadlali. Ngesikhathi lesi ngomnyaka odluleyo inkamba yeTsholotsho yayinyakazela ngokugcwala kwabadlali ababefuna ukutshengisela amathalenta kuyo.
Ngaleso isikhathi uSweswe wabikela iphephandaba likazulu ukuba iTsholotsho FC ilabo abadlali abagcwele indawo ezinengi ezibalisa iSouth Africa, iBotswana lakoBulawayo.
“Abadlali abafuna ukuzodlala kithi bakhona. Silabo abaseSouth Africa lakwezinye indawo. Angeke sizihluphe ngokuthenga lonyaka,” ngamazwi omqeqetshi lo.
Ngesizini ka2017 kukhanya iZiqholo zizalandela uhlelo olufanayo lokungathengi abadlali.
Online Reporter