Online Reporter
Nkosilathi Sibanda
INHLANGANISO ephethe ibhola kuleli, i-Zimbabwe Football Association, isimise umsebenzi onompembe abahlanu ngemva kokutholakala ukuthi benza izinqumo ezingalunganga ezathinta impumela yemidlalo.
Kumbiko okhitshwe ngoMvulo, iZifa ithe isinqumo lesi silandela imbiko eyethulwe ngo-commissioner bemidlalo.
Abamiswe umsebenzi nguPhikisani Ndlovu (umsekeli kanompembe), uChamunorwa Tapiwa (unompembe), uChristian Gumbeze (umsekeli kanompembe), uGraduate Mubobo (unompembe) loPraise Mkwevo (umsekeli kanompembe).
UPhikisani Ndlovu umiswe emidlalweni eyisithupha yeCastle Lager Premier Soccer League kusukela kuviki lesi-21 kusiya ku-26, kulandela ukusebenza kwakhe emdlalweni phakathi kweFC Platinum leHunters FC.
UChamunorwa Tapiwa loChristian Gumbeze bona bamiswe imidlalo eyisithupha yeligi yeNorthern Region Soccer League kulandela umdlalo weMarere FC leZambezi G & C.
Kusenjalo, uGraduate Mubobo loPraise Mkwevo bamiswe imidlalo eyisithupha yeSouthern Region Soccer League ngemva komdlalo owadlalelwa eChinotimba Stadium.
“Izijeziso lezi zibangelwe yizinqumo zabo nompembe, okutholwe ukuthi zaba lomthelela omkhulu kumpumela yemidlalo, ukwephula iSigaba 22 seZifa Referees Code of Conduct,” kutsho iZifa.
Inhlanganiso le ithe iyaqhubeka izimisele ukuqinisa ubuqotho, lokuphakamisa izinga lokwethulwa kwemidlalo kuyo yonke imincintiswano engaphansi kwayo.
