Ole-19 ugwetshelwe ukuthumba lokudlwengula uGrade 7

Culpable homicide is defined at common law as the unlawful negligent killing of a human being

YiNtatheli kaMthunywa

KULOMFANA oleminyaka engu-19 yokuzalwa ogwetshelwe ukuyapika iminyaka engu-15 ejele kulandela ukutholakala elecala lokuthumba kunye lokudlwengula umfundi okuGrade 7.

Kubikwa mhlaka 2 Mbimbitho ngomnyaka ka 2026 ngehola lika 4 emini, umsolwa wahlangana lomamangala evela esikolo wamvimba endleleni, wamtshaya andubana angene laye iganga lapho amgcina khona ubusuku bonke.

Umsolwa waze wakhulula umamangala ekuseni ngosuku olulandelayo. Kubikwa umamangala waqonda ngakibo lapho afika wabikela unina ngokwakwenzakele. Unina kazange aphozise amaseko wahle wahamba laye emapholiseni okwenza umsolwa wabotshwa.

Umantshi esethula isigwebo uthe ukhangele ubukhulu becala kanye lokuthi kwahlukumeza kanganani umamangala.

“Ukudlwengula licala elibi kakhulu elilempumela ehlala isikhathi eside kulowo ohlukuluziweyo. I-National

Prosecuting Authority of Zimbabwe (NPAZ) izaqhubeka isenza isiqiniseko sokuthi abadala amacala okudlwengula kanye lawo wonke amacala ocansi bayatshutshiswa futhi bathole izigwebo ezifanele izenzo zabo,” kutsho iNPAZ.

Abakhokheli bomphakathi ePlumtree banxuse abazali lalabo abakhangela abantwana ukuthi bahlale beqaphele futhi bakhuthaze abantwana ukuthi babike noma kuyini abakusolayo masinyane.

Kusenjalo kulendoda yeKezi ezakuyapika iminyaka engu-15 ejele ngecala lokudlwengula indodakazi yayo eleminyaka engu-18 yokuzalwa.

Indoda le, (42), esingeke sachaza igama layo ngenhloso yokuvikela umamangala imiswe emthethwandaba weGwanda mhlaka 13 Ntulikazi.

Umtshutshisi kulelicala ubikele inkundla ukuthi mhlaka 21 Mabasa ngehola lika 6 ntambama, umsolwa, umkakhe kunye lomamangala ababehlala ekamelweni elilodwa balungisa ukudla kwabo kwakusihlwa basebesiyalala.

Kubikwa umsolwa walala embhedeni lomkakhe, umamangala walala phansi. Kuthe ngehola lika 9 ebusuku umsolwa wehlika embhedeni waya lapho okwakulele khona umamangala wafika wamdlwengula kanye.

Umsolwa elokhu eqhubeka ngehlazo leli, umamangala wenelisa ukuqhweba unina owayelele embhedeni wavuka.

Unina kamamangala ebona lokhu, wahle wayabikela usobhuku owasuka wayabikela amapholisa okwabangela ukubotshwa kukamsolwa.