Online Reporter
Nkosilathi Sibanda
ABESILISA abane bagwetshwe iminyaka elitshumi ejele emthethwandaba kamantshi eGwanda ngemva kokutholakala belecala lobugebengu lodlame okwenzakala komunye umgodi wegolide kulindawo.
INational Prosecuting Authority of Zimbabwe ibike ukuba uFonet Maranganya (27), Malvin Maranganya (19), Prince Sibanda (22) loTatenda Ndlovu (23) batholakale belecala ngemva kokuqamba amanga bathi bafuna ukuthengisa igolide bona befuna ukuqila isisebenzi semgodini.
Isehlakalo lesi senzakale mhlaka 1 Mabasa 2026 ngehola lesikhombisa ntambama eBen Shire Mine, eBar 20, eGwanda, lapho uLearnmore Magodhi (39), ahlangana labasolwa laba ababefuna ukumthengisela igolide.
Kubikwa ukuthi ngesikhathi uMagodhi ebala imali ukuze athenge igolide, omunye wezigebengu wamhluthunela imali, baqala ukulwa.
Omunye wabasolwa wakhupha umbhobho wadubula kabili ekhombe uMagodhi, kodwa walwa ngamandla, wamthathela umbhobho njalo wamluma isandla, okwenza abasolwa babaleka.
Izigebengu lezi zatshontsha imali engange-R15 000 engasatholakalanga. Kodwa, batshiya ubufakazi obubalulekileyo obugoqela umakhalekhukhwini weSamsung, umbhobho ongelanhlamvu, izigqoko lama-sandalas, okusize amapholisa ekuphenyeni udaba.
Kubikwa njalo ukuba omunye wabasolwa wancedisa ukuthi amapholisa abambe abanye bakhe.
UMantshi ugwebe abane laba iminyaka engu-12 ejele, kodwa emibili yalengiswa okweminyaka emihlanu ngoba beziphathe kuhle, okutsho ukuthi bazapika iminyaka elitshumi ejele.
