Online Reporter
Patrick Chitumba
KULENDODA yeMbizo, eKwekwe ugwetshelwe ukuhlala ejele iminyaka engu-75 ngemva kokutholakala ilecala lokudlwengula abantwana abayisithupha.
URangarirai Mutangi oleminyaka engu-31 owaziwa kakhulu ngokuthi nguMama Bless njalo ubegqoka njengomuntu wesifazana.
Umiswe phambi kukamantshi weKwekwe, uNkosikazi Rumbidzai Mugwagwa, ebhekane lamacala amabili okudlwengula, amacala amahlanu agoqela ukuhlukumeza lecala linye lokuhlukuluza ngokocansi.
Inkundla izwe ukuthi amacala la enziwa phakathi kukaMpalakazi 2024 loMabasa 2026, njalo abantwana abahlukuluzwayo ngabafana abahlanu lentombazana eyodwa.
UMutangi walandula amacala la kodwa wacina etholakale elecala ngemva kokuqhutshwa kophenyo ngokupheleleyo.
Umtshutshisi uMichelle Daraja Nyamadzawo, utshele inkundla ukuthi omunye wabantwana abahlukunyezwayo yintombazana eleminyaka eyisitshiya galolunye ofunda uGrade 5.
Kuzwakale ukuba uMutangi wabizela umntwana lo endlini yakhe edlala phandle, wamethusela ngesibhamu ngaphambi kokumdlwengula.
Kubikwa ukuthi umntwana kazange atshele muntu ngenxa yokwesaba kwaze kwaba yilapho uyise esezwe amahlebezi okuthi uMutangi udlwengula abantwana.
Inkundla iphinde yezwa ukuthi uMutangi wayesebenzisa indlela efananayo ukuhlukuluza abafana, lapho ayebabizela endlini yakhe, ababukelise amavidiyo ezocansi.
Kwabanye abantwana, inkundla izwe ukuthi wayebasongela ngokubadubula nxa bengachaza ngalokho okwenzakeleyo
UMantshi Mugwagwa ugwebe uMutangi iminyaka engu-15 kumacala ehlukeneyo, okucine sekusenza ukuthi ahlale ejele okweminyaka engu-75.
“Ngosuku olungaziwayo kumtshutshisi kodwa phakathi kukaZibandlela 2026 loMabasa 2026, umamangala wayedlala phandle kwendlu lapho umetheswacala ambizela khona endlini,” kutsho umtshutshisi
Utshele inkundla ukuthi umamangala wangena endlini lapho uMutangi amtshela khona ukuthi wayefuna ukuhlangana laye, kodwa yena wala.
“Umetheswacala wasongela ukubulala umamangala ngombhobho, wasekhulula impahla zakhe. Wehlisa ibhulugwe lakhe wadlwengula umamangala.”
Kubikwa umamangala kazange abike ngokwamehlelayo.
UMutangi waphinda ukudlwengula umntwana lo ngoMabasa 2026. Udaba lwavela ngesikhathi uyise womntwana ezwe amahemuhemu okuthi uMutangi udlwengula abantwana.
Wabuzisisa umntanakhe, owaveza ukuthi wadlwengulwa kabili ngezikhathi ezitshiyeneyo.
Kuzwakale njalo ukuba phakathi kukaMpalakazi 2024, ku350/1 eMbizo, uMutangi wabiza omunye umamangala ongumfana ekamelweni lakhe lapho amnikeza khona umakhalekhukhwini efuna ukuthi abukele amavidiyo ocansi. Wamfuqela ukuthi alale ngesisu qede lapho wamgcoba amafutha wambhinya.
Waphinda wamethusela ngokumdubula ngombhobho engatshela abantu ngokwenzakeleyo.
Udaba lwavela ngemva kokuba umfana etshele unina. Kuvele njalo ukuba uMutangi wenza okufanayo kwabanye abafana.
