Online Reporter
Peter Matika
AMAPHOLISA koBulawayo aphumelele ukuhlenga izisebenzi eziyisithupha ebezibanjwe yizigebengu ezimbili, okusolakala ukuthi bezihlomile ezihlasele kwenye ibhawa enzikini yedolobho ngeSonto ekuseni.
Izigebengu lezi kubikwa ukuthi zibuthanise izisebenzi zeCrystal Lounge bazivalela ekamelweni ngaphambi kokuba zigqekeze, zibalekele le-US$4 300.
Zivale, zakhiya umnyango sezibaleka, kwakhanya sengathi ibhawa kayikavulwa.
Kubikwa amapholisa abikelwe ngesehlakalo ngumnikazi wendawo uMnumzana Phathisani Nkomo, obetshayelwe ucingo ngesinye ngesikhathi izigebengu zihlasela.
Kuqale ngokuza amapholisa ogatsha lwe-CID Homicide ethwele imibhobho, egqoke lama-bullet proof vests.
Kwalandela abogatsha lwePolice Special Tactics (PST). Kuvalwe umgwaqo kaRobert Mugabe kusukela ku9th kusiya ku-11th Avenue. Amapholisa angene phakathi, amanye aqansa phezulu kophahla, amanye egombolozele ibhawa le.
Aphume labantu abayisithupha, abayizisebenzi. Kodwa ke, izigebengu kazitholakalanga.
Isikhulumi samapholisa, uCommissioner Paul Nyathi uthe:
“Kubelesehlakalo sobugebengu esenzakale enzikini yedolobho lakoBulawayo. Ingatsha zamapholisa ethu zifike kulindawo. Ngesikhathi efika abasolwa besebebalekile batshiya bevalele abantu,” kutsho uComm Nyathi.
Uthe kuphenyo lwabo, bacabangela ukuthi ekugekezweni lokhu kungaba kulomuntu osebenza kulindawo olesandla phakathi.
“Zikhona insolo zokuthi kungabe kulesisebenzi esilesandla kulokhu. Ngithanda ukuxwayisa umphakathi ukuthi kasibuyeli emuva ekulwisaneni lobugebengu.”
