Online Reporter
Sukulwenkosi Dube-Matutu
UBABHEMI yisifuyo esiqakatheke kakhulu empilweni zabantu, yikho kwakhethwa umhlaka 8 Nkwenkwezi njengelanga lapho okunanzwa khona lesi isifuyo, emhlabeni wonke.
Isiqinti seGwanda, esabelweni seMatabeleland South, ngoLwesine ngeviki dluleyo sinanze lelilanga kukhankaselwa ukuthuthukisa inhlalakahle yabobabhemi.
Usuku lolu, luqhutshwelwe kuWard 17 ngaphansi kwendikimba ethi “Obabhemi basebenza njengamahlombe, imilenze, ingalo kunye lemihlane yabesifazane emaphandleni eZimbabwe”.
Umkhosi lo uqoqwe yinhlanganiso yeWomen and Land in Zimbabwe, ngenhloso yokukhankasela ukuphathwa kuhle kwabobabhemi. Kulumkhosi bekubuthene abalimi, lapho abanye babo abangene kumncintiswano wokugcina kuhle obambhemi lemizi yabo.
Ekhuluma kulumbuthano, uDistrict Development Coordinator weGwanda, uNomathemba Ndlovu uthe obabhemi baqakatheke kakhulu ngakho kumele banakekelwe.
“Obabhemi badlala indima enkulu emphakathini kodwa umsebenzi wabo kawuqakathekiswa. Lamuhla sihlangene lapha ukuzo nanza ukuqakatheka kwabo babhemi empilweni zethu, ngokuncedisa imuli lokuletha ingqubekela phambili.
“Siyabonga uhlelo lwe-Women and Land in Zimbabwe ngokubambana loHulumende ekukhankaseleni ukugcinwa kwabobabhemi ngendlela eyiyo, ikakhulu esigabeni seGwanda kuWard 2, 17 lo-19.”
