Online Reporter
Bongani Ndlovu
AMAPOLISA koBulawayo aphenya amacala amabili okutshontshwa kwezimota zohlobo lweHonda Fit ePumula South lasenzikini yedolobho.
Kucala lakuqala, kulomtshayeli oleminyaka engu-52 yokuzalwa ohlala eCowdray Park wathathelwa imota yakhe ngemva kokuhlaselwa ngamadoda abane ePumula South ebusuku ngeSonto edluleyo.
Amapholisa athe umtshayeli lo wayehambisa enye indoda ayengayazi, esuka phakathi kwedolobho esiya ePumula South.
Ekufikeni kwabo endaweni kulelilokitshi, ngezikhathi zabo-10 ebusuku, umtshayeli wama egedini kwenye indlu lapho okwehla khona umuntu lo ayemthwele. Kubikwa umtshayeli lo watshiya imota iduma ngesikhathi encedisa ukukhipha impahla, bangena endlini.
Kodwa, esebuyela emoteni, wahlangana lamadoda amane ephuma emnyameni.
“Omunye wabo wakhupha ingqamu waqonda kuye. Ngokwesaba ukuthi angalimala, umtshayeli wabaleka. Abasolwa bangena emoteni, bahamba layo,” kutsho amapholisa.
IHonda Fit le ilinganiselwa ku-US$4 500 njalo kuze kube yisikhathi sokubikwa kwecala bekungakatholakali lutho.
Kwelinye icala elenzakale ngoMvulo ntambama, indoda eleminyaka engu-30 yokuzala eyelokitshini leSizinda yalahlekelwa yiHonda Fit yayo ngemva kokuyipaka phambili kwesitolo esikhulu phakathi kwedolobho.
Amapholisa athe indoda le yapaka imota emnyama ngehola lika-7.30 ebusuku, yavala iminyango, yangena lamakhiye esitolo.
Kuthe isiphenduka ngemva kwemizuzu engaba mihlanu, yathola ukuthi imota yayo kayisekho.
Imota le ilinganiselwa ku-US$5 000 njalo layo ibingakatholakali ngesikhathi kubikwa icala.
Okhulumela amapholisa eBulawayo u-Inspector Nomalanga Msebele ucele loba ngubani ololwazi olungancedisa ukuthi abasolwa babotshwe ukuthi abikele amapholisa aseduzane.
Uphinde waxwayisa abayshayeli ukuthi baqaphele nxa bethwala abantu abangabaziyo, ikakhulu ebusuku, njalo bangatshiyi imota zabo zingelamuntu.
“Abatshayeli bakhuthazwa ukuthi batshiye imota zabo endaweni ezivikelekileyo kanye lokufaka ama-tracking devices ukuze kube lula ukulandelela lokuthola imota etshontshiweyi,” kutsho uInsp Msebele.
