Online Reporter
Nkosilathi Sibanda
UMONGAMELI Emmerson Mnangagwa wethule amazwi okuhlonipha amalunga ebutho, encoma umsebenzi wabo wokuvikela ilizwe lokugcina ukuthula.
UMongameli Mnangagwa, ebika kukhasi lakhe leFacebook, uthe ilizwe lihlonipha abesilisa labesifazane abakubutho ngokuba lesibindi lokuvikela ilizwe.
NgoLwesibili ilizwe linanze iminyaka engu-46 yeZimbabwe Defence Forces Day. Indikimba yomkhosi walonyaka uthi: “Zimbabwe Defence Forces: Guaranteeing Peace and Stability for the Attainment of Vision 2030”
“Ukukhula lokuthuthuka komnotho ngeke kwenzakale kungelakuthula okupheleleyo. Ngifisa ukusebenzisa umkhosi lo ukubonga abantu beZimbabwe ngokusekela kwethu iZimbabwe Defence Forces. Amabutho ethu aqinisekisa ukuthi kube lokuvikeleka ukuze siguqule iZimbabwe ibe lilizwe elilomnotho osezingeni eliphezulu phakathi kwamazwe asathuthuka, i-upper-middle-income society.
“Kusukela ekuvikeleni imingcele yethu kuze kufike ekuncedeni umphakathi ngesikhathi sengozi, ukuthembeka kwenu kanye lobungcitshi benu emsebenzini akuthathelwa phansi. Silala ngokuthula ngoba lina lilindile. Ilizwe siyaziqhenya ngani. Qhubekani ngalumfutho njalo liqhubeke ngomsebenzi omuhle owenza iZimbabwe Defence Forces ibe libutho elithembekileyo, elilobungcitshi njalo elihlonitshwa kakhulu,” kutsho uMongameli Mnangagwa.
