admin
Ncekwenhle Ncube
LIDLA amahabula inina lakoSigiti, eMatopo ngemva kokuba indodana yalo ikhitshwe ilihlo yizigelekeqe ngoba ilamulele umngane wayo obesilwa lazo.
Lindaba esemlonyeni yabantu lalamuhla yenzakale koSigiti indawo engaphansi kwenduna uMathe.
Kubikwa kwaba lokuxabana phakathi kukaKenson Nkiwane lamanye amajaha okubikwa athwalise izakhamizi amagabha avuzayo ngemva kokuba bebambe umnawakhe walujaha bamqabuja phambili kwakhe evela esikolo.
Lokhu akumphathanga kuhle uKenson owayehamba loDirector Ncube umngane wakhe, wahle watsho esondela watshela umnawakhe ukuthi ahambe ekhaya ngoba emehlisa isithunzi ebantwini ababebukele ezitolo ngesikhathi kusenzakala lokhu.
Lokhu kwenza iqula lamajaha agoqela uNtobeko Mkandla, Thompson Banda, Mike Sibanda loLatisha Sibanda bahlasele uKenson ngoba bethi ubathathele umfazi wabo.
Kuzwakele ukuthi amajaha la eqela uKenson lomngane wakhe uDirector ngenhloso yokubadinda kodwa kwangenela abantu ababeseduze babalamula abanye bazama ukubatshaya bacela ezinyaweni.
Ekhuluma lentatheli uDirector uchaze ngeke alikhohlwe ilanga akhitshwa ilihlo yizigelekeqe zamajaha la.
Uthe bathe sebelanyulelwe yizakhamizi basuka lapho labo bazama ukuthi babaleke lomngane wakhe ngoba amajaha la ayesebahlasela ephethe izikhali ezigoqela indunku, amarekeni lamatshe.
Uchaze ukuthi bacatsha entabeni okwenza izigelekeqe lezo zedlula zingababonanga.
“Safika ekhaya sekusebusuku ngoba sasesisesaba ukuthi bengasibulala endleleni njengoba babehlomile futhi babeke bafika kibo kaKenson batshisa impahla zakhe.
“Sathi silungiselela ukuya emapholiseni khonapho sisanda kufika batsho labo sebefikile. Ngasukuma ngavala umnyango bahle bawugamula ngehloka bawuwisela phansi. Baqala ukudiliza umduli bethi bafuna indlu iwele phakathi sitshe sonke.
“Abanye babejikijela ngamatshe, omunye wangitshaya ngelitshe engicabanga ukuthi ngelerekeni langitshaya ilihlo kwahle kwaba yikho ukufa kwelihlo lami. Ngabubula ngoba ngezwa ubuhlungu obumangalisayo bona bahle bacela ezinyaweni,” kutsho uDirector.
Intatheli ikhulumisane lonina kaDirector uNkosazana Ntokozo Mthunzi okhulume ngelivutha amalangabi esithi yena amapholisa kumele enze umsebenzi wabo ngoba umntanakhe waphuma ilihlo ngezikliwi ezingabotshwayo.
“Sicela amapholisa enze umsebenzi wawo. Umtanami kalalihlo khathesi kodwa kulokhe kungakhanyi ukuthi kwenziwani. Abantu bazaze bebulalane nxa umthetho uxegiswa.
“Umfowabo wamajaha la uMethuseli Banda wabuya esithi sikhulumisane ngahle ngamtshela ukuthi mina nxa sixolisana kuphele nje njalo kumele bangiphe ilihlo lomtanami.” kuchaza uNkszn Mthunzi.
UMnumzana Methuseli Banda uchaze ukuthi udaba olunjalo lwenzakala sibili kodwa kalalwazi ukuthi lwenzankala njani ngoba laye wayengekho.
Imizamo yokuxhumana lesikhulumi samapholisa uInspector Philisani Ndebele yehlule ngoba ucingo lwakhe belunganeni.
Online Reporter