admin
Johas Moyo
KUBANJWE intombazane elilisela litshontshe utshwala kwesinye isitolo esikhulu enzikini yedolobho leGweru ngeviki ephelileyo.
Ababone lokhu kusenzakala bathe umsolwa okuzwakale ukuthi nguCharmaine Manengi ubanjwe wasala esenjenge nkukhu enethiweyo nanko phela abamaziyo besebekhwaza bethi kabotshwe ngoba uhlala ebatshontshela endaweni ezitshiyeneyo.
Abamaziyo umsolwa bathi indlela eba ngayo iyisimanga ngoba usehlala elamacala athi angabotshwa abhadalelwe ibheyili aphume.
Umsolwa okubikwa ukuthi uyindodakazi yomunye umphathisikolo owaziwayo kulindawo kubikwa sokukanengi ebanjwa eseba ezitolo ezinkulu.
UNkosazana Lindsay Muzarabani ubikele intatheli ukuthi wafunda lomsolwa njalo ucabanga ukuthi sekulidlozi kuye ngoba vele ukutshontsha kakuqalisanga khathesi loba esikolo wayethi engatshontsha imbambathwe indaba ngoba engumntwana kamphathi.
“Akungimangalisi ukuthi umsolwa ubanjwe etshontsha ngoba sekuyinjwayelo kuye. Kwaqalisa esafunda okobusela khathesi sewapasa ukutshontsha ngoba abazali bakhe bamekela wafukamela ubusela waze wachamisela.
Kasabhalanga loFomu 6 ngoba wahle wadla imali yesikolo abadala bakhe kabamenzanga lutho nanko khathesi usekhatshana ngokutshontsha,” kutsho uNkszn Muzarabani.
Uqhubekele phambili wathi umsolwa ngitsho lendlini uyathatha nje cala celeni kube ngani akusonto enkulu kubazali bakhe. Lokho yikho osekwenze ukuthi izakhamizi zidle inja ngaye ngoba esehluphile njalo engahloniphi.
“Ubanjwe efake utshwala, amaqanda, inyama kanye leziwiji esikhwameni okucatshangelwa ukuthi wayefuna ukuyakunatha lendoda yomnikazi engumakhelwane wakhe,’’ kutsho uNkszn Muzarabani.
UMthunywa uxhumane loAlbert Ncube omunye wamajaha ake aphilisana laye yena oveze ukuthi wehlukana laye ngaleso sizatho sokungafuni ihlazo empilweni yakhe ngokuhlala ethonisiswa izikwelede kumbe ukubizwa intombi yakhe nxa isitshontshile.
“Kuyayangisa ukuthandana lesela lapho abangakibo bayabe belifukamela njalo bengafuni ukuthi lihambe ejele.
Ngahlukana laye ngalezo zinto,’’ kutsho uMnu Ncube.
Imizamo yokuxhumana lamapholisa eGweru yehlule ngoba isikhulumi besingekho ewofisini.
Online Reporter