admin
YiNtatheli kaMthunywa
ZILOKHU zinkemile izisebenzi zesinye isitolo eWest Nicholson kulandela ukuhlaselwa yizigelekeqe zatshontsha iR17 000, omabonakude kanye lempahla etshiyeneyo.
Oguluva laba kubikwa bahlasele isitolo seMkhombedzi ngoMvulo kuviki ephelileyo ngehola lika-8 ntambama.
Kuzwakale ukuthi esinye isisebenzi sesitolo lesi uMongiwa Masuku wezwa umsindo eselele wavuka wavula i-curtain kancane wabona izigelekeqe lezi ziphethe amabhemba, lamahloka bagamula isivalo bangena phakathi.
Bafika balaya izisebenzi zesitolo lesi ukuthi zibanike imali bathatha iR17 000 kanye lomabonakude.
Kubikwa izigelekeqe lezi zathi zisuka lapho zaqhubekela phambili zaya esitolo esilandela lesi.
Isisebenzi sesitolo esilandelayo uThamsanqa Khanye ngenxa yokuthi wayevele esezwile wahle wahloma bathi befika wagamula omunye wabo okuyikho okwenza bahle bacela ezinyaweni.
Ekhuluma lentatheli omunye wabomakhelwane uMnumzana Bongani Thebe uveze ukuthi bona bezwa umsindo ebusuku.
“Mina ngasengilele ngezwa ngomsindo abantu behwabha beqamba esinye isisebenzi besithi sivule umnyango kodwa sala. Bacina bevula ngamandla bathatha imali eyesabekayo, lathi sikhonapha njengezakhamizi sesihlalele evalweni,” kutsho uMnu Thebe.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe solufikile ehofisini yakhe kodwa basaphenyisisa ngalo.
“Samukele udaba lwezigelekeqe ebezihlomile ezihlasele izitolo zeWest Nicholson kodwa sisaphenyisisa ngalo,” kuphetha uInsp Ndebele.
Online Reporter