shloboe boe
Ethel Ncube
BABUKELE ibhayisikopo yamahala ezitolo zeManinji eMayobo, ePlumtree kulandela ukulwa okubekhona kubangwa umnikazi wesitolo.
UNyarai Mpofu umiswe emthethwandaba wePlumtree esetheswa icala lokuhlukumeza omunye kubangwa indoda. Umtshutshisi uSelestine Madziwa ubike ukuba amanina la ahlasela omunye bethi uthandana lomnikazi wesitolo.
“UNyarai Mpofu wahamba labafowabo ezitolo ngenyanga ephelileyo bafika badinga uNoliwe Mpofu othengisa esitolo sikaOwen Ndebele. UNoliwe bathi bemtshaya bamtshela ukuba bamtshayela ukuthi uthandana loOwen umnikazi wesitolo lapha okuthengisa khona uNoliwe.
Omama laba bathi beqeda ukumtshaya ababili bacela ezinyaweni babaleka njalo abakabanjwa.
Kwabanjwa uNyarai Mpofu nguye yedwa owabotshwayo,” kubika uSelestine.
Icala likamsolwa uNyarai lizaqhubekela phambili.
Kusenjalo kulendoda egwetshwe amahola angu-210 ngemva kokutshaya umfazi isithi uthandana lomphurofethi.
UMotwell Moyo oleminyaka engu-45 yokuzalwa umiswe emthethwandaba wePlumtree phambi kukamantshi uJoshua Nembaware esetheswa icala lokuhlukuluza.
Umtshutshisi uSelestine Madziwa ubike ukuba umsolwa watshaya umkakhe.
“UJudice Ndlovu umkaMotwell Moyo watshela umkakhe ukuba ufuna ukuya emthandazweni kuShelton Nyathi. Umsolwa lokhu akumphathanga kuhle, uthe evuka ekuseni wavuka watshaya umkakhe esithi uthandana lomphurofethi okwenza umsolwa wabotshwa,” kutsho uSelestine.
Umantshi uJoshua Nembaware uphe umsolwa isigwebo somnyaka wasesephula kwasala amahola angu-210 lapho azasebenza khona mahala esuka ngekhaya kuze kukwane amahola awaphiweyo.
Online Reporter