admin
YiNtatheli kaMthunywa
ILIZWE leZimbabwe selihlezi liqaphele njalo lilindele ukubhekana lokuhlasela kwentethe nanko phela sekuphume imbiko yokuqhamuka kwazo emazweni abalisa iNamibia kanye leBotswana.
UMnumzana Shingirai Nyamutukwa okhokhela uhlangothi lwePlant Quarantine and Plant Protection Research Services Institute ngeSonto uthe kube lesixwayiso kulandela imbiko yokuqhamuka kutsha kwentethe eBotswana kanye leNamibia wengeza ngokuthi kulezigaba zonke zentethe lezi kusukela kumpethu kusiya kwezindala.
Uthe iZimbabwe izaqhubeka ikhangela imizamo yokulawula umonakalo ongabangelwa yikufika kwentethe lezi kuleli. Izulu elinayo libangele izimo eziyizo ezibangela ukwanda kwentethe emazweni la okuyikho osekusenza inhlanganiso ezibona ngokuvikelwa kwezilimo ukuthi zithathe amanyathela ngokuvikela izilimo.
Nyakenye kuqhamuke intethe kweleZimbabwe, Botswana, Namibia kanye leZambia kodwa amazwe la enelisa ukuzilawula.
Ngenyanga kaMpalakazi nyakenye uNyamutukwa wathi kwaba lokuqhamuka kwentethe eGokwe, Dera kanye leKanyendavhu kodwa benelisa ukuvimba umonakalo ezingawudala.
I-SADC kanye lenhlanganiso ezithintekayo ezifana le International Red Locust Control Organisation for Central and Southern Africa (IRLCO-CSA) zasebenza lamazwe omane ukuze kulawulwe izibungwana njalo kuvikelwe impilo zabantu.
I-FAO yaqala iphurojekithi ebizwa ngokuthi yi-Southern Africa emergency locust response and preparedness project, esekelwa ngemali luhlelo lwe-FAO’s Technical Cooperation Programme.
Online Reporter