admin
Siphathokuhle Ngulube
Salibonani bafundi.
Ngithemba lizilandela kahle izifundo zenkulumo esibalazo kumaviki onke.
Singalibali phela ukuthi izifundo lezi ziqakatheke kangakanani ezimpilweni zethu.
Sitshilo phela phambilini ukuthi lezi izifundo ziyasakha njalo zisenza sibe ngabantu ebantwini.
Sixoxile njalo ukuthi lezi izifundo zikhuthaza kakhulu ubuntu.
Umuntu ongelabuntu esintwini akamukeleki ngitsho emphakathini.
Ngeviki ephelileyo sike saxoxa kabanzi ngezinto ezimbi ezenziwa ngabafundi nxa sebezaqeda imihloliso yokucina ebangeni eliphezulu.
Kuvelile ukuthi ngalesi isikhathi abanye balahlekelwa yibuntu bacine nje sebesenza izinto ezingakhangelelwanga bathwalise nzima ababalisi okuyinto embi kakhulu njalo engakhangelelwanga.
Ake sikhangele izehlakalo ezingaphansi:
1.Yingxenye yokucina yomnyaka. Selilungiselela ukubhala imihloliso yokuphela komnyaka.
Wena lomngane wakho lingena endlini yokufundela ligele amakhanda latshiya izicholo kwathi eceleni lapha ladweba imizidlana emibili.
Nxa lingena nje endlini yokufundela umbalisi uhle akhwaze, alibize ahle alibuze ngesenzo senu lesi esokugela ngendlela ephaphene lalokho okukhangelelwe yisikolo.
Umngane wakho uThemba alahle izandla aphendule athi:
“Mbalisi lapha silande ukuzobhala hatshi ukuzotshunyayezwa ngezinto ezingalani lomhloliso.
Ukugela kwethu kungenelana ngaphi lokubhala umhloliso.
Thina siyabhala siyahamba ngeviki ezayo. Siyaqala ukuziphilela eyethu.
a) Ubona angathi inkulumo yakho le izamphatha njani umbalisi?
b) Yiwaphi amagama asempendulweni kaThemba akhomba ukungahloniphi?
c) Inkulumo kaThemba le iveza similo bani alaso?
d) Kuyinto enhle yini ukungalandeli imithetho yesikolo?
2. Lingamajaha ambalwa eviyo okulo.
Lizimele nje phandle lilinde ukungena endlini yokufundela lapho okumele libhalele khona umhloliso wenu wokucina webanga eliphezulu.
UNkosikazi Ndlovu uyalibiza ukuba lizomelekelela ukulungisa indlu elizabhalela kuyo.
UJabulani uphendula umbalisi esithi:
“Nkosikazi thina sizobhala umhloliso hatshi ukuzohlanza izindlu zokufundela.
Bakhona abafundi abakubanga eliphansi abangenza lowomsebenzi ngcono.
a) Inkulumo kaThemba iveza similo bani ngaye.
b) Ubona angathi le inkulumo izamphatha njani unkosikazi Ndlovu?
c)Mfundiso bani uThemba alayo kwabanye abafundi?
d)Ubathatha njani abafundi abancane uThemba?
e) Kambe uThemba utshiya eyakhe ubudlelwano obunjani lababalisi njengoba eqeda nje imihloliso?
Izehlakalo lezi ezingaphezulu ziveza khona kanye okwenziwa ngabanye babafundi nxa seqeda isikolo.
Batshiya bevoxe ubudlelwano babo lababalisi.
Lokhu kuyinto embi kakhulu ngoba impilo ayaziwa bafundi.
Umuntu kukhangelelwe ukuthi loba kungaphi lapho akhona akhe ubudlelwano obuhle ukuze lanxa esevelelwe luhlupho lowo muntu athole usizo.
Okunye njalo okumele kunanzelelwe ngabafundi yikuthi ukuphela kwezifundo ayisikho kuphela kwempilo.
Impilo iyaqhubeka ngaphandle kwesikolo.
Lokho otshiye ukuhlanyele esikolo laphandle kuyakulandela.
Online Reporter