admin
Khanyile Ndebele
ABALIMI sebekhuthazwe ukuba bazame ukulima isilimo se-cauliflower ngoba sivuma umkhathi wezulu ophinda ube lokutshisa.
Omunye umlimisi we-Agritex koBulawayo, uNkosazana Stella Rombe uthe abalimi bangazilimela i-cauliflower ngoba ikhula masinya njalo kuhle ngesikhathi sezulu kanye lokutshisa.
Uthe okwakuqala abalimi okufanele bekunanzelele yikuthi umhlabathi wabo kumele ube ungena lula amanzi phansi.
“Okunye futhi umlimi okumele akulimuke yikuthi isilimo se-cauliflower sifuna ukutshisa kwelanga okuphakathi kwe-16 kusiya ku-20 degrees besekusithi i-pH yakhona kumele ibe ku-6 kusiya ku-6.5.
Uthe nxa umlimi esehlanyela amagodi akhe kumele atshone abe yi-1,25cm kukanti phakathi kwegodi linye ngalinye kumele kube lentanga ezimbili loba ezintathu.
UNkszn Rombe uthe isilimo lesi sifuna umvundiso we-Compound C, S lo L besekusithi iAmmonium Nitrate ifakwe ngemva kwamalanga angu-7, 14, 21 kumbe 28 ngemva kokuba isihlumile.
Uqhubekele phambili esithi kuhekitha inye ngayinye umlimi engaba lama-cauliflower angu-28 000 kusiya ku35 000.
Uthe i-cauliflower ilakho ukuhlaselwa ngumkhuhlane weClub root leBlackrot kunye lentwala lamawemusi.
“Ukuze umlimi alwise umkhuhlane we-clubroot angengeza ubumunyu bomhlabathi buye ku-7,2 ngokufaka i-Calcitic lime kuthi ekulwiseni i-blackrot angasebenzisa i-copper fungicides,” kutsho uNkszn Rombe.
Uqhubekele phambili echaza ukuthi isilimo lesi sifuna amanzi amanengi ukuze sibukeke.
Isilimo se-cauliflower sivuthwa ngemva kwenyanga ezintathu.
Online Reporter