admin
“OMUNYE umuntu wangitshela ukuthi angeke ngife njalo angipheli. Ngisasele lemendulo zegolide ezimbili.”Lapha bekukhuluma u-Usain Bolt waseJamaica ngemva kokuthola imendulo yeGolide kumjaho we100m ngemizuzu engu-9,8 seconds kumincintiswano yamaOlympics ka2016 edolobheni leRio de Janero eBrazil kuliviki.
Lokhu kubengokwesithathu uBolt evuthela isiqubu kulesisigaba sokugijima lapho athole igolide lakhe lesithathu kumango we100m. Amanye amagolide wawathola ngo2008 eBeijing lango 2012 edolobheni leLondon.
Ogijimela isizwe seMelika uJustin Gatlin uphutshe ekunombolo yesibili, etshiywe nguBolt nge- 0,08 secs. Olandeleyo kubengu Andre de Grasse waseCanada othole imendulo ye-bronze.
UDe Grasse uqede ngemva kwemizuzu engu- 9,91seconds phambili kukaYohan Blake ogijimela iJamaica.
UBolt ubike ukuba usamele athole imendulo yaphezulu kumjaho 200m le 4x 100m njengalokho akwenza kumaOlympics amabili adluleyo.
“Ngizwa angathi angigijimanga kakuhle loba nje nginqobile. Ngiyajabula ngalokhu esengikwenzile ngoba akula omunye owake wakwenza.
“Bengisicabanga ukuthi ngizagijima ngesiqubu esizwayo, kodwa kuhle engikwenzileyo, ngizaqhubekela phambili.”
Kusenjalo, isizwe seMelika siyakhokhela kuluhlu lwemendulo. Ngokudindwa kwephephandaba likazulu ngoLwesithathu, iMelika ibilemendulo ezingu-84. IBritain iyalandela nge-51, kuthi iChina ibiseduzane nge- 50.
Online Reporter